Татарстан Президенты Россия Сәламәтлек саклау министрлыгының баш невролог-табибы белән очрашты

Татарстан Президенты Рөстәм Миңнеханов Бөтенроссия неврологлар җәмгыяте идарәсе рәисе, РФ Сәламәтлек саклау министрлыгының баш неврологы, Н.И.Пирогов исемендәге Россия милли тикшеренү медицина университетының неврология һәм нейрохирургия кафедрасы мөдире, Россия медицина фәннәре академиясе академигы Евгений Гусев белән очрашты. ТР Хөкүмәт Йортында узган очрашуда Мәскәү Сәламәтлек саклау департаменты баш неврологы Алексей Бойко һәм ТР сәламәтлек саклау министры Айрат Фәррахов катнашты.

Евгений Гусев һәм Алексей Бойко Казанга, модернизацияләнгән баш Республика кан тамырлары үзәге ачылышында катнашу өчен килгәннәр.Үзәк Төбәкара клиник-диагностика үзәгендә эшли, ул баш мие кан әйләнеше бозылган пациентлар өчен неврология, кардиореанимация, көчле инфаркт, нейрохирургия,кан тамырлары хирургиясе, нур диагностикасы, ультратавыш һәм функциональ диагностика бүлекләрен берләштерә.

Профессиональ белгечләр, югары класслы медицина техникасы – магнит-резонанслы томограф,компьютерлы томограф һәм ультратавышлы аппаратлар - болар барысы да авыруларга комплекслы һәм оператив ярдәм күрсәтергә мөмкинлек бирә.

Яңартылган кан тамырлары үзәгендә палаталар зурайтылган, санузеллар җиһазландырылган. Индивидуаль рәвештә һәм төркемләп дәвалау физкультурасы белән шөгыльләнү мөмкинлеге бар.

Бүгенге очрашу барышында Евгений Гусев һәм Алексей Бойко яңа үзәкнең югары дәрәҗәдә булуын билгеләделәр һәм Рөстәм Миңнехановка республикада сәламәтлек саклау мәсьәләләренә бирелгән игътибар өчен рәхмәт белдерделәр.