Рөстәм Миңнеханов:”2012елның икътисади нәтиҗәләрен бик уңышлы дип санарга мөмкин”

Бүген Татарстан Президенты Рөстәм Миңнеханов ТР Икътисад министрлыгы һәм ТР Сәнәгать һәм сәүдә министрлыгы коллегияләренең уртак йомгаклау утырышында булды.Коллегияләр эшендә шулай ук Россиянең икътисади үсеш министры урынбасары Олег Савельев ,РФ сәнәгать һәм сәүдә министры урынбасары Глеб Никитин,Татарстан Дәүләт Советы рәисе Фәрит Мөхәммәтшин һ.б. катнашты.

ТР Президенты 2012ел йомгаклары буенча Татарстанның икътисади үсешенең төп күрсәткечләрен хәбәр итте.Тулай региональ продукт 5,5% ка арткан һәм 1,415трлн сум тәшкил иткән.”Бу бездә ышаныч тудыра”,-диде Р.Миңнеханов.
Сәнәгать җитештерүенең күләме 7% ка арткан,нефть продуктларын җитештерү 26% ка,машина төзелеше продукциясе – 27% ка,металлургия сәнәгатенеке - 26% ка,резина һәм пластмасс эшләнмәләр җитештерү – 11% ка .

“Безнең иң зур казанышыбыз – уңай демография.2012елда туган балалар саны узган елга караганда 5100 гә артыграк.Гомер озынлыгы да арта – ул 72,3ел тәшкил итә”,-дип белдерде ТР Президенты.

Р.Миңнеханов сүзләренчә,Татарстанда уртача эш хакы 2012елда 23240 сум тәшкил иткән,узган елдагыга караганда 16,3% ка артык.

Татарстанның 2012 елдагы икътисади үсешенең төп күрсәткечләре турында үзенең докладында ТР икътисад министры Мидхәт Шаһиәхмәтов хәбәр итте.Татарстанның тулай региональ продукты үсеше сәнәгать җитештерүенең күләме,инвестиция активлыгы, төзелеш һәм кулланучылар активлыгы арту белән тәэмин ителгән.

ТР сәнәгать һәм сәүдә министры Равил Зарипов республикада хезмәт җитештерүчәнлеген күтәрү өчен башкарыла торган чаралар турында сөйләде.

РФ сәнәгать һәм сәүдә министры урынбасары Глеб Никитин Татарстан җитәкчелеген сәнәгать җитештерүендәге уңышлары белән котлады.”Россиянең күп регионнарына сезгә тигезләшү кирәк”,-диде ул.

Коллегияләр утырышы тәмамланганда,”2013 – 2016 елларда Татарстанның машина төзелеше һәм нефть химиясе предприятиеләрендә хезмәт җитештерүчәнлеген күтәрү” программасы кысаларында ТР Хөкүмәте белән “Россия Саклык банкы” ААҖ арасында хезмәттәшлек килешүе имзаланды.