Республиканың кайбер муниципаль берәмлекләре тарафыннан узган ел өчен мәктәпләргә капиталь ремонт ясау нәтиҗәләре буенча хисап бирелмәгән

18 февральдә торак – коммуналь хуҗалыкларын үзгәртеп коруга булышлык итү өчен , күп фатирлы йортларга капиталь ремонт ясау, гражданнарны авария хәлендәге тораклардан күчерү һәм ЖКХ программасын яңарту программаларына Федераль Фондка акча күчерелү хакында РФ Хөкүмәте Карары имзалану көтелә.Шуннан соң Фонд акчасы хисабына финанс ярдәме РФ субъектларына күчереләчәк.

Бүген ТР Хөкүмәт Йортында Татарстан Президенты Рөстәм Миңнеханов рәислегендә узган атналык республика киңәшмәсендә ТР төзелеш,архитектура һәм торак- коммуналь хуҗалык министры Ирек Фәйзуллин хәбәр итүенчә, республикада быел капремонт ясалырга тиешле күп фатирлы йортлар исемлегенә 41 муниципаль берәмлектә 811 йорт кертелгән. Гомуми планлаштырылган акча күләме – 4,35 млрд.сумнан артык.

ТР МК күрсәтмәсе белән 2013елда капремонт ясалырга тиешле муниципаль гомуми белем бирү мәктәпләре исемлегенә 162 объект (шул исәптән Казанда 20 мәктәп) һәм 7 коррекцияләү мәктәбе кертелгән.

Министр Ирек Фәйзуллин сүзләренчә,кайбер муниципаль берәмлекләр узган ел өчен мәктәпләргә капремонт ясау буенча хисап бирмәгәннәр.Ул Әлмәт,Әлки,Югары Ослан, Нурлат районнарын,Казан һәм Чаллы шәһәрләрен әйтеп узды.

“Бердә матур түгел ,болай сезнең арттан йөрүе”,- диде үз чиратында ТР Президенты, бу муниципаль берәмлекләрнең җитәкчеләренә мөрәҗәгать итеп. – Башта “Акча бирегез!”,- дип сорыйсыз,сез узган ел өчен хисап бирмичә,бу елга акча булмаячак”,-дип белдерде ул.

ТР муниципаль берәмлекләрендә 2013елда сәламәтлек саклау оешмаларын төзү һәм капремонт ясау программасына килгәндә ,Татарстанда фельдшер-акушерлык пунктларын төзү өчен 68 төзелеш мәйданы әзерләнгән.Бүгенге көндә ФАП, амбулатория һәм участок сырхауханәләренә капиталь ремонт ясауны 14 районда башлаганнар.