Татарстан Президенты Берләшкән Гарәп Әмирлекләренең тышкы сәүдә министры белән очрашты

Бүген Әбу – Дабида Татарстан Президенты Рөстәм Миңнехановның Берләшкән Гарәп Әмирлекләренә (БГӘ) эш сәфәре башланды.ТР Президенты БГӘнең тышкы сәүдә министры Шейха Любна Халид әл Касими белән очрашты.Россия делегациясен РФ сәнәгать һәм сәүдә министры Денис Мантуров җитәкли,очрашуда шулай ук РФнең БГӘ дәге Гадәттән тыш һәм Тулы Вәкаләтле илчесе Андрей Андреев, “Ак Барс Холдинг”ААҖ генераль директоры Иван Егоров,ТР Президентының халыкара мәсьәләләр буенча ярдәмчесе Радик Гыйматдинов катнашты.

Очрашу алдыннан Рөстәм Миңнеханов Шейха Любна белән әңгәмә корып, аны Татарстанга 2013 елның маенда узачак KAZANSUMMIT форумында катнашырга чакырды,БГӘ тышкы сәүдә министры чакыруны кабул итте.

Очрашуда Россия делегациясе вәкилләрен сәламләп, “Без сезнең делегациядә безнең күптәнге дустыбыз Рөстәм Миңнехановны күрүебезгә бик шатбыз. Татарстан Президенты без уздырган барлык чараларда да бик теләп катнаша”,-диде Шейха Любна.

“Бездә үзара хезмәттәшлекнең үсеше өчен зур потенциал бар.Һәм мин Россия – Әмирлек хөкүмәтара комиссиясе рәисләренең берсе буларак, безнең сәүдә – икътисад мөнәсәбәтләре үсеше белән шөгыльләнәчәкмен.Бүгенге хөкүмәтара комиссия утырышы илләребезнең эшмәкәрлек үсешенә өстәмә импульс булыр дип ышанабыз,-дип белдерде Денис Мантуров.

РФ сәнәгать һәм сәүдә министры әйтүенчә,Россия һәм БГӘ арасында хезмәттәшлекнең традицион юнәлешләре урнашкан – болар нефть-газ өлкәсе һәм машина төзелеше.Моннан тыш Денис Мантуров, хезмәттәшлекнең өметле юнәлеше буларак, энергиянең альтернатив чыганакларын уртак тикшерүне атады.

Очрашу тәмамланганда Шейха Любна Халид әл Касими Россия делегациясе вәкилләренә,Россия – Әмирлек хөкүмәтара комиссиясе утырышында уңышлар теләде һәм бу утырыш Россия һәм БГӘ арасындагы хезмәттәшлекне киңәйтергә ярдәм итәр,-дигән ышанычын белдерде.