Рөстәм Миңнеханов: “Россия төбәге буларак без Берләшкән Гарәп Әмирлекләре белән киң хезмәттәшлек алып барабыз”

Татарстан җитәкчелеге Берләшкән Гарәп Әмирлекләре (БГӘ) белән хезмәттәшлеккә зур игътибар бирә һәм аның киләчәктәге үсешенә өметләнә.Бу хакта Татарстан Президенты Рөстәм Миңнеханов Россия – Әмирлек хөкүмәтара комиссиясе утырышы барышында хәбәр итте. Утырыш Әбу-Дабида РФ сәнәгать һәм сәүдә министры Денис Мантуров һәм БГӘ тышкы эшләр министры Абдалла бине Зәйед әл Нахайян рәислегендә узды.

Сәүдә,икътисад һәм фәнни-техник хезмәттәшлек буенча Россия – Әмирлек комиссиясе 1994 елда оештырыла. Комиссиянең беренче утырышы 1997елның мартында була,шуннан бирле утырыш даими рәвештә уздырыла.

БГӘ тышкы эшләр министры бүгенге утырышны ачып һәм Россия делегациясе вәкилләрен сәламләп,- “Без Россия белән хәрби, сәнәгать,мәдәният,сәясәт өлкәләрендә мөнәсәбәтләрнең үсешенә ышанабыз.Бүген БГӘ компанияләре Россия базары белән кызыксыналар”,-дип белдерде.

Бүгенге көндә БГӘ компанияләренең инвестицияләре Россиядә 22млрд.доллардан артык тәшкил итә.” Үсеш өчен потенциал бар, һәм бу сумманы арттырырга мөмкин, дип саныйбыз.Безнең илләр арасында товар әйләнеше 2млрд. доллар тәшкил итә,ләкин бу бик түбән күрсәткеч,бу күрсәткечне арттырырга мөмкин,чөнки ике илнең дә җитәкчелегендә моңа карата кызыксыну бар”,-дип басым ясады БГӘ тышкы эшләр министры.

Үз чиратында Денис Мантуров Россия делегациясен җылы каршылауларына рәхмәтен белдерде. “Бүгенге утырыш безнең мөнәсәбәтләр үсешендә яңа этапны билгели”,-диде ул.

Татарстан Президенты Рөстәм Миңнеханов утырыш барышында, Татарстан РФ субъектларының берсе буларак, БГӘ белән киң хезмәттәшлек алып бара,- дип хәбәр итте. “ Без шулай ук якын арада Дубайда үз вәкиллегебезне ачуны планлаштырабыз,һәм бу мәсьәләдә мин сездән ярдәм итүегезне сорар идем,” – дип мөрәҗәгать итте ул Абдалла бине Зәйед әл Нахайянга.ТР Президентының теләкләре комиссия утырышының йомгаклау протоколына кертелде.

Утырыш тәмамланганда Россия – Әмирлек хөкүмәтара комиссиясе утырышының йомгаклау протоколы имзаланды.Документка Денис Мантуров һәм Абдалла бине Зәйед әл Нахайян имзаларын куйдылар.