М. Ш. Шәймиев Санкт-Петербург шәһәре һәм Ленинград өлкәсе делегациясе белән очрашты

Бүген Казан Кремлендә ТР Дәүләт Киңәшчесе Минтимер Шәймиевнең Ленинград өлкәсе Законнар чыгару җыелышының депутаты Илдар Гилязов җитәкчелегендәге Санкт-Петербург шәһәре һәм Ленинград өлкәсе делегациясе белән очрашуы булып узды.
Делегация составында Бөек Ватан сугышы ветераннары, Ленинград өлкәсенең татар җәмгыятьләре җитәкчеләре, сугыш һәм хәрби хезмәт ветераннары иҗтимагый оешмалары вәкилләре.
Алар Казанга махсус Ватанны саклаучылар бәйрәме көннәрендә килделәр, алар Татарстан җитәкчелегенә Советлар Союзы герое , шагыйрь –сугышчы, Ленинград өлкәсе территориясендәге Любань хөҗүм итү операциясендә актив катнашучы Муса Җәлил һәйкәле – бюстын тапшырдылар. Һәйкәл 2012 елның 9 ноябрендә Ленинград өлкәсенең Тосно шәһәрендә, Муса Җәлил сугышкан 2 нче хәл иткеч хөҗүм ясаучы армиянең канлы сугышлары узган урында ТР Мәдәният министры Айрат Сибгатуллин катнашында ачылды.
Кунаклар тагын бер истәлекле бүләк алып килгәннәр – герой-шагыйрь Муса Җәлил яраланган һәм әсирлеккә алынган урыннан җир тутырылган снаряд гильзасы, ул иртәгә Казан ратушасындагы Ватанны Саклаучылар көненә багышланган бәйрәм тантанасы вакытында Бөек Ватан Сугышы Музей-мемориалына тапшырылачак.
Бүген Кремлнең Вәкиллек корпусында делегацияне ТР Президентының социаль мәсьәләләр буенча ярдәмчесе, “Яңарыш” фондының башкарма директоры Татьяна Ларионова каршы алды һәм аларга федераль әһәмияте булган “Мәдәни мирас: борынгы Болгар шәһәре һәм Свияжск утрау-шәһәре” мәдәни-тарихи проектын тәкъдим итте, Делегация Болгар һәм Свияжскиның тарихи истәлекләре стенды, макетлары белән, шулай ук төзелгән һәм төзелүче яңа корылмалар, әлеге тарихи истәлекләрне яңадан торгызу эшләре барышы белән танышты.
Очрашу башында ТР Дәүләт Киңәшчесе Минтимер Шәймиев төбәктәге татар җәмгыятьләренә ярдәм итүләре, Татарстанга игътибарлары, татар халкының бөек улы – Муса Җәлилгә куелган һәйкәл өчен һәм Ленинград янындагы сугышларда хәлак булганнарның барысын да мәңгелләштергәннәре өчен делегация әгъзаларына рәхмәтләрен белдерде.
“Сез, ленинградчылар һәм Санкт- петербургта торучылар – зур хөрмәткә лаек үзенчәлекле халык. Сугыш һәм сугыштан соңгы вакытларда һәрвакыт ярдәмчел булуыгыз белән аерылып торасыз, изге эшләргә шундый зур эчкерсезлек белән алынасыз. Бу бик кыйммәтле нәрсә. Безгә кирәк булган рухиятнең шундый мисалы булу, безне рухи яктан баетып торучы шундый җир булуы бик әйбәт”,- дип билгеләп үтте Минтимер Шәймиев.
Ул Ленинград өлкәсе Тосно районы муниципаль белем бирү башлыгы Сергей Барановка, Бөек Ватан сугышында катнашкан Федор Левскийга, Ленинградтагы сугыш һәм сугыш хезмәте ветераннарының төбәкара иҗтимагый оешмасы комитеты рәисе Василий Гладышинга рәхмәт хатлары тапшырды.
Ленинград өлкәсендәге Законнар чыгару җыелышының депутаты Илдар Гилязов Минтимер Шәймиевкә җылы кабул итүе өчен рәхмәтләрен белдерде һәм “Яңарыш” фонды белән хезмәттәшлеккә ышануын әйтте.