Татарстанда еллык планнан 20 проценттан артык торак йорт сафка бастырылган

Бүгенге көндә республикада торакны сафка бастыру буенча еллык бирем 21 процентка үтәлгән, 505,3 мең кв метр мәйданда торак сафка бастырылган. Шуның 125,4 мең кв метры социаль ипотека йортларына туры килә. Быелгы программа буенча, Татарстанда әлеге социаль программа буенча 110 йорт өлгертелергә тиеш. Бүгенгә шуларның 23 е сафка баскан. Тагын 48 объект югары әзерлек стадиясендә санала, ә 42 йорт түбән әзерлек дәрәҗәсендә. Әлеге мәгълүматлар бүген ТР Хөкүмәте йортында торакны сафка бастыру мәсьәләсенә багышланган республика киңәшмәсендә яңгырады. Киңәшмә ТР Президенты Рөстәм Миңнеханов рәислегендә үтте.
Кайбер муниципалитетларда, шул исәптән, Казанда, төзелештә графиктан калышу очраклары күзәтелгән. Президент Рөстәм Миңнеханов моңа ачыклык кертүне таләп итте. Дәүләт торак фонды Башкаручы директоры Тәлгать Абдуллин моның бернинди объектив сәбәпләре юк, подрядчылар эш көчендә, финанслау тиешенчә алып барыла, ди. Аның аңлатуынча, беркадәр калышу графикка салкын карау, урыннарда хакимият башлыкларының игътибары кимү нәтиҗәсе. Бүгенге сөйләшү, хәлне уңай якка үзгәртү, кимчелекләрне төзәтү өчен ярдәм итәр, дигән ышаныч белдерде ул. Коммерцияле торак төзелешенә килгәндә, быел сафка басарга тиешле 107 күпфатирлы йортның 66 сы югары әзерлек дәрәҗәсендә санала. 24 е түбән әзерлек дәрәҗәсендә. Төзелеш, архитектура һәм торак-коммуналь хуҗалык министры Ирек Фәйзуллин инвестицияле торак төзелеш буенча бездә уңай динамика саклануын, динамиканың уртача 2 процентка артуын искәртте. Азкатлы торак төзелешенә килгәндә, быел Татарстанда шундый 7190 объект кулланылышка тапшырылырга тиеш. Шуларның 1500 гә якыны югары әзерлектә булса, 3352 йортның әзерлеге түбән. Ирек Фәйзуллин 2013 ел программасы буенча бу юнәлештә эшчәнлекне активлаштырырга кушты.
Төп хисапчы ролендә чыгыш ясаган министр республикада Бөек Ватан сугышы ветераннарының торак шартларын яхшыртуның барышына да тукталды. Хәзерге вакытта Татарстанда 423 ветеран өчен 42 йорт төзелә. ТР Төзелеш, архитектура һәм торак-коммуналь хуҗалык министрлыгы муниципаль берәмлекләр белән берлектә, февраль аенда субсидияләр алган 913 ветеранның торак шартларын яхшырту буенча программа формалаштырган. Аннан күренгәнчә, 613 ветеранны яңа төзелгән фатирларга күчерү планлаштырыла.
Министр Казан шәһәре, Яшел Үзән һәм Ютазы районнарында узган елгы йөкләмәләрне үтәп бетерәсе барлыгына басым ясады. Бүген аларда 10 ветеранның нинди торакларга күчәсе ахыргача хәл ителмәгән. “Тиз арада бу мәсьәләгә чишелеш табарга кирәк”,- дип искәртә төзелеш министры.