Без яшьләрне ничек тәрбияләсәк, аларның илебезгә мөнәсәбәте шундый булачак, дип саный Сергей Погодин

Татарстандагы балалар йортлары базаларында кадет мәктәпләре оештыру күздә тотыла, башлап – Яшел Үзән районындагысында.
Татарстанда булган 1272 белем бирү учреждениенең барысында да узган уку елында хәрби хезмәт нигезләренә әзерлек эшләре үткәрелгән. Аерым алганда, аларның 1134е урта (тулы) гомумбелем бирү учреждениесе, 35е башлангыч һәм 103е урта һөнәри белем бирү учреждениеләре дип күзалларга кирәк.
Шулай ук кадетлык белеме бирү эше дәвам иттерелә: Татарстанда тәрбиягә авыр бирелә торган балалар, ятимнәр һәм гаиләләрендә хәлләр уңышлы булмаган балаларны җәлеп иткән кадет мәктәпләре, мәктәп-интернатлары, классларын берләштергән тулы бер челтәр гамәлдә. Хәзерге вакытта республиканың Казан, Бөгелмә, Түбән Кама, Тәтеш, Актаныш, Кама Тамагы, Минзәлә, Байлар Сабасы, Болгар, Чирмешән, Чистай кебек торак пунктларындагы барлыгы 11 кадет мәктәп-интернатта 1678 бала, шулай ук Казан, Яшел Үзән, Чистайда 1әр, Чаллыда 4 кадет мәктәбендә 2897 укучы, урта гомумбелем бирү мәктәпләрендәге 175 кадет классында 3227 малай һәм кыз укый, патриотик рухта тәрбияләнә. Нәтиҗәдә, кадетлык белеме яшь буынның 7802 вәкилен колачлаган, былтыр исә 8 мең чамасы малай һәм кыз кадетлык курсын тәмамлаган, 2006 елда нибары 2 меңгә якын иде. Алга таба, конференцияләрнең берсендә ТР Премьер-министры урынбасары Равил Моратов игълан иткәнчә, Татарстандагы балалар йортлары базаларында кадет мәктәпләре оештыру күздә тотыла, башлап – Яшел Үзән районындагысында. Дөрес, аның ничегрәк буласын әлегә әйтеп булмый, һәрхәлдә, шундый концепция бар, дип белдерде бүген ТР Министрлар Кабинетында уздырылган брифингта ТР хәрби комиссары Сергей Погодин.
Генерал-майор сүзләренчә, кадетлык класслары түбәндәге юнәлешләрдә эшли: хәрби юнәлеш – 220 кл. (3981 укучы), полиция – 94 кл. (2025 укучы), гражданнар оборонасы һәм гадәттән тыш хәлләр – 68 кл. (1402 укучы), Казанның Совет районында наркотикларның законсыз әйләнешенә контрольлек итү федераль хезмәте идарәсе карамагында – 1 кл. (14 укучы), Бөгелмә шәһәрендә казак классы – 1 кл. (24 укучы).
“Гомумән, һәрбер яшь кеше үз иленең тарихын, халкының данлы юлын белергә, үзенең Ватанына кирәклеген аңларга тиеш. Без яшьләрне ничек тәрбияләсәк, аларның илебезгә мөнәсәбәте шундый булачак”, - дип саный Сергей Погодин.