Рөстәм Миңнеханов Казан (Идел буе) федераль университетының берничә фәнни бүлекчәсендә булды

Татарстан Республикасы Президенты Рөстәм Миңнеханов Казан (Идел буе) федераль университетының Фундаменталь медицина һәм биология институты фәнни-белем бирү үзәгендә булды.Аны КФУ ректоры Илшат Гафуров, ТР фән һәм мәгариф министры Энгель Фаттахов,ТР сәламәтлек саклау министры Айрат Фәррахов озатып йөрде.Алар уку аудиторияләре һәм лабораторияләрен карадылар, яшь галимнәрнең эшләре белән таныштылар.
Хәзерге вакытта КФУның Фундаменталь медицина һәм биология институты – зур уку-укыту-фәнни үзәге, анда 12 кафедра, 30 фәнни-тикшеренү лабораторияләре, җәйге практикалар өчен 4 уку-укыту фәнни базасы, зоология һәм ботаника музейлары, кече инновация предприятиеләре, Ботаника бакчасы эшли.

Аннан соң, Рөстәм Миңнеханов һәм калган кунаклар, КФУның Филология һәм сәнгать институтын карадылар. Татар теле һәм әдәбияты үзәгендә – татар телен он-лайн өйрәнү программасы кысаларында барган дәресне күзәттеләр,программаны тыңлаучылар белән сөйләштеләр.

Соңыннан КФУ хезмәткәрләрен бүләкләү тантанасы булды. Кайбер белгечләргә “ТРның атказанган фән эшлеклесе”, “ТРның атказанган югары мәктәп хезмәткәре”, “ТРның атказанган юристы” –дигән мактаулы исемнәр бирелде.