Менделеев районында 2012 елга нәтиҗә ясадылар

Бүген Татарстан Премьер-министры Илдар Халиков ТРның Менделеев районында булды. Ул район Советы сессиясендә катнашты, анда узган елга нәтиҗә ясалды.
ТР Премьер-министры сәфәрен район үзәк хастаханәсеннән башлады, анда кабул итү-диагностика һәм хирургия бүлекләрендә, реанимация һәм операция блокларында капиталь ремонт барышы белән танышты. “Биредә эшләр яхшы башкарылган, бу кешеләргә хезмәт күрсәтү сыйфатына йогынты ясаячак”, - дип билгеләп үтте И.Халиков.
Аннары ТР Менделеев муниципаль районы Советы сессиясе булды.
Менделеев районы башлыгы Игорь Привалов үз докладында 2012 елда районның социаль-икътисади үсеше нәтиҗәләре һәм 2013 елга куелган бурычлар хакында сөйләде. “2012 ел – икътисади үсеш елы булды, барлык күрсәткечләр буенча фаразланган унышларга ирешелде. Сәнәгать үсеше, инвестицион үсеш дәрәҗәсе, хезмәт хакы арту уңай факторлар булып тора”, - дип ассызыклады ул.
Район башлыгы кадрлар җитмәү проблемасына игътибарны юнәлтте. Менделеев районы территорисендә 122 нче һөнәр училищесы эшли, ул 2013 елның гыйнварыннан Түбән Кама нефть химиясе һәм нефть эшкәртү техникумы филиалы булды. Училищеда кадрлар әзерләү системасының өстенлеге Карпов исемендәге химия заводы, “Менделеевазот”ның җитештерү мәйданчыкларын файдалана алудан гыйбарәт. Студентлар анда практика узгач эшкә дә урнаша ала. Игорь Привалов республика Хөкүмәте җитәкчесенә училищеның уку базасын киңәйтүдә һәм студентлар өчен тулай торак төзүдә ярдәм итүне сорап мөрәҗәгать итте.
“Район “Төп капиталга инвестицияләр” күрсәткече буенча 2012 елда муниципаль берәмлекләрнең социаль-икътисади үсеше рейтингында беренче урынны били. Бу күрсәткеч республикадагы уртача күрсәткечләрдән 15 тапкыр югары. Бу район халкы өчен генә түгел, гомумән, республика өчен дә киләчәккә ышаныч уята”, - дип ассызыклады ТР Премьер-министры.
Шулай ук Хөкүмәт җитәкчесе Татарстанлыларның, шул исәптән Менделеев райны халкының да тормыш дәрәҗәсен күтәрергә максатчан программаларны гамәлгә ашыру мөмкинлек бирә, дип белдерде. “Татарстанда 20 елга беренче тапкыр туучылар саны арткан. Яшьләргә дәүләт ярдәме булгач, алар курыкмыйча бала таба. Менделеев районында да үлүчеләр саны 10 процентка кимегән. Димәк, сәламәтлек саклау, мәгариф өлкәсенә, яңа мәдәният һәм спорт объектлары төзелешенә сарыф ителгән дәүләт акчасы халыкка уңайлыклар тудырырга ярдәм иткән”, - дип ассызыклады ул.
Илдар Халиков билгеләп үткәнчә, узган ел һава шартлары начар булу сәбәпле, авыл хуҗалыгы җитештерүчеләре күрсәткечләренә тискәре йогынты ясады. Менделеев районы хезмәтчәннәре алдынгылар рәтендә булмаса да, гаилә фермалары, шәхси ярдәмче хуҗалыклар саны арттырылган. Бу эшне дәвам итү зарури. Авыл хуҗалыгы һәм азык-төлек министрлыгы белән авыл хуҗалыгын нәтиҗәле алып бару, тармакның табышлылыгын күтәрү, язгы кыр эшләренә вакытында әзерләнүнең яңа формаларын табарга кирәк. Чәчү эшләренә әзерләнмичә, хуҗалыкларны минераль ашламалар белән тәэмин итүдән нәтиҗә булмаячак.
Республика Премьер-министры сүзләренә караганда, район торакларны һәм социаль объектларны капиталь ремонтлау, социаль ипотека, ветераннарны торак белән тәэмин итү, авария хәлендәге йортлардан күчерү программаларын уңышлы гамәлгә ашыра. Менделеев районында күпкатлы йортларны ремонтлауга 37 миллион сум сарыф ителгән, 179 ветеран яңа фатир алган.
ТР Премьер-министры мәгълүматлаштыруны үстерүгә игътибар юнәлтүне сорады. “Электрон рәвештә дәүләт хезмәтләрен актив куллану авыл халкы өчен бигрәк тә мөһим. Кешеләрне һәр белешмә өчен шәһәргә йөрүдән, түрәләр бүлмәсе янында чиратта торудан азат итү зарур”, - диде ул.
Аннары Илдар Халиков юл комплексы мәсьәләсенә тукталды. Татарстан Президенты йөкләмәсе буенча кече торак пунктларга асфальт җәю программасы эшләнелә дип сөйләде. “2013 елда Менделеев районы юлларны ремонтлауга һәм төзүгә 106,2 милилон сум акча алачак”, - дип белдерде ул.
Илдар Халиков чыгышы ахырында районның узган елда ирешкән уңышлары өчен җитәкчелеккә, депутатларга, предприятиеләр, оешмалар һәм учреждениеләр җитәкчеләренә һәм халыкка рәхмәт белдерде, районның алдынгы хезмәтчәннәренә дәүләт бүләкләре тапшырды.