Татарстан Президенты Австрия Республикасының Транспорт, инновация һәм технология министры урынбасары белән очрашты

Бүген Татарстан Республикасы Президенты Рөстәм Миңнеханов Австрия Республикасының Транспорт, инновация һәм технология министры урынбасары Андреас РАЙХХАРДТ белән очрашты. Хөкүмәт Йортында узган очрашуда шулай ук ТР Икътисад министры Мидхәт Шаһиәхмәтов, ТР Транспорт һәм юл хуҗалыгы министры Ленар Сафин, ТР Төзелеш, архитектура һәм торак-коммуналь хуҗалыгы министры Ирек Фәйзуллин, ТР Инвестицион үсеш агентлыгы җитәкчесе Линар Якупов катнаштылар. Австрия делегациясендә берничә Австрия компаниясе вәкилләре булды.

Рөстәм Миңнеханов кунакларны сәламләде һәм Татарстанның перспективалы үсеш проектлары турында сөйләде. Президент сүзләренчә, республикада чит ил компанияләре өчен уңай шартлар булдырылган. Инвесторлар өчен иң кызыклы мәйданчыкларның берсе - «Алабуга» МИЗ, анда инде 34 резидент теркәлгән, алар инвестицияләренең гомуми күләме 3 млрд доллардан артып китте.

Транспорт өлкәсендә, Рөстәм Миңнеханов сүзләренчә, республика масштаблы проектны ашыруда «Европа – Көнбатыш Кытай» транспорт коридорын төзүдә катнаша.

Инновация өлкәсендә Австрия эшмәкәрләренә Казан янында төзелеп килүче «Иннополис» юлдаш шәһәре кызыклы булырга мөмкин.

Татарстан Президенты республиканың Австряи компанияләре белән төрле тармаклар буенча хезмәттәшлек итәргә әзер икәнлеген искәрте.

Австрия Республикасының Транспорт, инновация һәм технология министры урынбасары Андреас РАЙХХАРДТ үз чиратында Рөстәм Миңнехановка очрашу өчен рәхмәтен белдерде. Ул Австрия делегациясенең Татарстанга әлеге визиты Татарстан Республикасы һәм Австрия арасындагы мөнәсәбәтләрнең үсешенә, яңа эшлекле бәйләнешләр барлыкка килүенә ярдәм итер, дип ышануын белдерде.