Рөстәм Миңнеханов Төрекмәнстан Президенты Корбангули Бердымөхәммәдов белән очрашты

Бүген Татарстан Республикасы Президенты Р.Н.Миңнеханов Төрекмәнстан Президенты Корбангули Бердымөхәммәдов белән очрашты. Очрашу Ашхабадта, Огүзхан исемендәге Төрекмәнстан Президенты сарае комплексында узды.  

Исегезгә төшерәбез, Рөстәм Миңнеханов бүген көннең икенче яртысында эш визиты белән (2013 елның 20-21 марты) Ашхабадка “Нәүрүз – тынычлык һәм кешелеклелек бәйрәме” халыкара конференциясен тантаналы рәвештә ачуда катнашу өчен килде.  

Рөстәм Миңнехановны сәламләп, Төрекмәнстан Президенты Корбангули Бердымөхәммәдов Нәүрүз бәйрәменең олы бәйрәм икәнен билгеләп үтте, бу бәйрәм 2009 елда ЮНЕСКОның кешелекнең матди булмаган мәдәни мирасы исемлегенә кертелгән, аннары халыкара бәйрәм буларак уздырыла башлаган.  

Корбангули Бердымөхәммәдов билгеләп үткәнчә, бүген Россия Федерациясе белән Төрекмәнстан арасында ике яклы күркәм мөнәсәбәтләр урнашкан, шул исәптән ул Россия регионнарына да тарала, аерым алганда, федерация субъектларының берсе – Татарстан Республикасына да.

Безне Татарстан белән бик күп нәрсәләр берләштерә, диде Корбангули Бердымөхәммәдов , бу – мәдәниятләр бергәлеге, тел һәм гореф-гадәтләрнең охшашлыгы. Аның сүзләренчә, болар бар да яз, тынычлык һәм берләшү бәйрәме – Нәүрүз нигезенә салынган. Төрекмәнстан Президенты Рөстәм Миңнехановка Нәүрүз бәйрәменә багышланган бәйрәм тантаналарында катнашуы өчен рәхмәт белдерде.  

Рөстәм Миңнеханов, үз чиратында, Төрекмәнстан җитәкчелегенә үз илләренә Нәүрүз бәйрәмендә катнашырга чакырган өчен рәхмәтен белдерде. Ул шулай ук Корбангүли Бердымөхәммәдовка Россия Федерациясе Президенты Владимир Путинның сәламләвен һәм Нәүрүз бәйрәме белән котлавын җиткерде. Рөстәм Миңнеханов, кичә, 19 мартта, Владимир Путинның Казан шәһәрендәге 2013 елгы Бөтендөнья җәйге универсиадасын әзерләүгә һәм үткәрүгә бәйле чараларда катнашу өчен Татарстан башкаласында булуын әйтте.

Нәүрүз – барыбыз өчен дә уртак бәйрәм, шул ук 2009 елда ул ЮНЕСКОның кешелекнең матди булмаган мәдәни мирасы исемлегенә кертелгән, - бу сезнең казаныш, диде Рөстәм Миңнеханов, Төрекмәнстан Президентына мөрәҗәгать итеп.

Рөстәм Миңнеханов билгеләп үткәнчә, бүген Төрекмәнстан белән, федерация субъектларының берсе буларак, Татарстан арасындагы мөнәсәбәтләрне,шул исәптән икътисад, мәгариф һәм мәдәни мөнәсәбәтләрне үстерү өчен бөтен мөмкинлекләр бар.

Ашхабадта Нәүрүз бәйрәмен уздыруда Әфганстан Ислам Республикасы, Иран Ислам Республикасы, Пакистан Ислам Республикасы, Таҗикистан Республикасы, Төркия Республикасы, Әзәрбәйҗан Республикасы, Кыргызстан Республикасы, Казахстан Республикасы катнашалар.

Белешмә өчен:

Язгы көн белән төн тигезлеге бәйрәме төрки һәм фарсы халыклар өчен яңа ел башлану “Нәүрүз” фарсычадан “яңа көн” дигәнне аңлата. Галимнәр фикеренчә, бу бәйрәмнең тарихы бик борынгы.
СССРда Нәүрүз рәсми рәвештә булмаса да мөселман республикаларында билгеләп үтелгән. СССР таркалганнан соң Нәүрүз Урта Азиянең барлык республикаларында, Әзәрбәйҗанда рәсми рәвештә дәүләт дәрәҗәсендә бәйрәм ителә.
2009 елның сентябрендә Нәүрүз ЮНЕСКОның кешелекнең матди булмаган мәдәни мирасы исемлегенә кертелгән.
2010 елның 23 февралендә БМО Генераль Ассамблеясенең 64 сессиясендә 21 март Халыкара Нәүрүз көне дип игълан ителгән.
Беренче мәртәбә халыкара бәйрәм статусында Нәүрүзне Әзәрбәйҗан (2010 ел) билгеләп үткән, 2011 елда - Таҗикистан, 2012 елда - Казахстан, 2013 елда – Төрекмәнстан.