Татарстанда 473 күп фатирлы торак йортларда капиталь ремонт ясый башлаганнар инде

Татарстан Республикасында күп фатирлы торак йортларны капиталь ремонтлау программасына 4,709 млрд.сумга 823 йорт кергән. Бу хакта видеоконференция режимында узган республика киңәшмәсендә ТР төзелеш, архитектура һәм торак коммуналь хуҗалыгы министры Ирек Фәйзуллин хәбәр итте.
Киңәшмә ТР Хөкүмәт Йортында узды, аны ТР Президенты вазыйфаларын башкаручы – ТР Премьер-министры Илдар Халиков алып барды.

Ирек Фәйзуллин әйтүенчә, бүгенге көнгә 473 күп фатирлы торак йортта капиталь ремонт буенча эшләр башланган инде.

Мәктәпләргә капиталь ремонт ясау программасына килгәндә, хәзерге вакытка 169 гомуми белем бирү мәктәбе тикшерелгән, һәм 38 муниципаль берәмлекләрнең 135 объектында эшләр башланган.

2013 елда сәламәтлек саклау учреждениеләрен төзү, ремонтлау программасына Татарстан Республикасы районнарында 417 сәламәтлек саклау учреждениесе кергән.
Бүгенгә ТРда модульле ФАПлар төзелеше өчен 68 мәйдан әзерләнгән: 33 фундамент салынган, заводта 30 ФАП комлпекты ясалган.
Төзелеш мәйданнарына 11 ФАП комлпекты чыгарылган: 4сендә монтажлау эше төгәлләнгән, 5сендә монтажлау эше бара, 2сендә әзерлек эшләре бара.

Алга таба Ирек Фәйзуллин кыскача Казандагы 45мең урынлы яңа футбол стадионы (Чистай ур.) мәйданындагы төзелеш эшләре турында кыскача сөйләде.