Рөстәм Миңнеханов һәм Ros Roca Group/INDOX компаниясе вәкилләре берничә юнәлеш буенча хезмәттәшлек вариантлары турында сөйләштеләр

Бүген Татарстан Республикасы Президенты Рөстәм Миңнеханов һәм Ros Roca Group/INDOX (Испания) компаниясе вәкилләре үзара файдалы хезмәттәшлек мәсьәләләре турында сөйләштеләр.

Очрашу Татарстан Республикасы Хөкүмәт Йортында узды, чарада Ros Roca Group/INDOX компаниясе вице-президенты, генераль менеджеры Сальвадор Рока, ТР Премьер-министры урынбасары – ТР Министрлар Кабинеты Аппараты җитәкчесе Шамил Гафаров, ТР Президенты ярдәмчесе Ринат Сабиров, ТР Төзелеш, архитектура һәм торак-коммуналь хуҗалыгы министрлыгы, ТР Транспорт һәм юл хуҗалыгы министрлыгы, ТР Экология һәм табигать ресурслары министрлыгы һәм «КАМАЗ» ААҖ вәкилләре катнашты.

Яклар каты көнкүреш калдыкларын аралау һәм җыю, җәмәгать транспортына, йөк машиналарына, авыл хуҗалыгы машиналарына һ.б. ягулык сыйфатында газны файдалану кебек юнәлешләр буенча хезмәттәшлек вариантлары турында сөйләштеләр.

Ros Roca Group/INDOX компаниясе технологияләре безгә бик тә кызыклы, дип әйтте Рөстәм Миңнеханов. Ул Татарстан “Газпром” компаниясе белән инде транспортны газ ягулыгына күчерү проекты турында сөйләшүен билгеләп үтте. Булган технологияләр моны эшләргә мөмкинлек бирәләр һәм без “Газпром” ААҖ белән әлеге мәсьәләне чишә алабыз, дип әйтте Рөстәм Миңнеханов.

Ros Roca Group/INDOX компаниясе вәкилләре Рөстәм Миңнехановка компания эшчәнлеге турында һәм калдыкларны җыю өлкәсендәге, автомобильләргә ягулык урынына газны куллану өлкәсендәге проектлары турында сөйләделәр. Алар Барселона шәһәре мисалында каты көнкүреш калдыкларын җыю турында сөйләделәр.

Транспортны газ ягулыгына күчерүгә килгәндә, әлеге проект белән "КАМАЗ” ААҖ кызыксыну белдерде. 

Очрашуга нәтиҗәләр ясаганда, Рөстәм Миңнеханов проектларны җентекләп өйрәнү һәм алар буенча алдагы хезмәттәшлек өчен, шулай ук әлеге юнәлешләрдә Ros Roca Group/INDOX компаниясе тәҗрибәсен өйрәнү өчен берничә мәсьәләләр блоклары буенча эш төркемнәре оештырырга тәкъдим итте. Ros Roca Group/INDOX компаниясе белән хезмәттәшлек турында әңгәмә берничә айдан соң дәвам итәчәк, дип исәпләнә. Ros Roca Group/INDOX компаниясе вәкилләре Татарстан белгечләрен Испаниягә компания эшчәнлеге һәм аның производствосы белән танышу өчен чакырдылар.