Татарстан Премьер-министры Рөстәм Миңнеханов «ИНГ Банк (Евразия)» ябык акционерлык җәмгыятен «Евромани – Казан» халыкара инвестиция (капитал салу) форумында катнашырга чакыра

“ИНГ Банк (Евразия)” ябык акционерлык җәмгыяте вәкилләре белән бүген Татарстан Республикасы Хөкүмәте йортында Татарстан Республикасы Премьер-министры Рөстәм Миңнеханов очрашты. Очрашу танышу характерында барды. “ИНГ Банк (Евразия)” ябык акционерлык җәмгыятен аның генераль директоры Александр Писарук тәкъдим итте (ул бу вазыйфага 2007 елның июнендә сайланып куелган иде).
Тышкы икътисади эшчәнлек буенча Татарстан Республикасы Премьер-министры ярдәмчесе Искәндәр Мөфлиханов журналистларга хәбәр иткәнчә, “ИНГ Банк (Евразия)” ябык акционерлык җәмгыятенең Татарстан Республикасы белән хезмәттәшлеге уңышлы һәм озак вакытлы. Банк Татарстанның «ТАИФ-НК» ААҖ, «Казаньоргсинтез» ААҖ, «ТАНЕКО» ААҖ кебек эре компанияләре катнашында алып барыла торган берничә проектка турыдан-туры кредит биреп тору һәм капитал салуда катнаша.
Очрашу барышында Татарстан Республикасы Премьер-министры Рөстәм Миңнеханов “ИНГ Банк (Евразия)” ЯАҖ җитәкчелеген “Евромани” төркеме булышлыгы белән 15 октябрьдә Татарстанның башкаласында ачыла торган “Евромани – Казан” халыкара инвестиция (капитал салу) форумында катнашырга чакырды. Әгәр “ИНГ Банк (Евразия)” әлеге капитал салу форумында катнашса, берничә проектның потенциал капитал салучылары буларак, республика башкаласына “ИНГ Банк (Евразия)” клиентлары һәм партнерларының да игътибары җәлеп ителәчәк.

Белешмәләр өчен:
“ИНГ Банк (Евразия)” ЯАҖ

“ИНГ Банк (Евразия)” ЯАҖ (ING Wholesale Banking) “ИНГ Групп” (ING Group)ның бүлендек банкы булып тора. Рәсәй базарында ул 1944 елдан башлап эшли. Ул - Рәсәй җитештерүчеләре һәм Рәсәйдә эшләүче халыкара компанияләрнең төп кредит биреп торучыларыннан берсе.
Россия Федерациясе Үзәк банкының 2495 нче номерлы лицензиясе нигезендә эш алып барган хәлдә, Банк резидент һәм резидент булмаганнар өчен сумнар һәм чит ил валютасы белән операцияләр башкаруның тулы спектрын тәкъдим итә. Банк исәп-хисаплы касса хезмәте күрсәтү эшен алып бару, эчке валюта һәм финанс базарларында хезмәт күрсәтү буенча, корпоратив финанслар һәм капитал салудагы банк хезмәтләре күрсәтү өлкәсендә депозит (акча яки кыйммәтле кәгазьләр биреп тору) булышлык күрсәтү буенча эчке базарда ныклы позиция били.
Рәсәйдә Банк штаб-квартирасы сәясәтен үткәреп, “ИНГ Банк (Евразия)” ЯАҖ Рәсәй базарында озак эшләү максатын куя.
Мәскәү офисында 200 дән артык хезмәткәр эшли.

“Евромани” төркеме
“Евромани” төркеменә финанс һәм банк тематикасы буенча махсуслашкан 100 гә якын компания керә. 1969 елда компаниянең оешуына нигез салган басма булып “Евромани” айлык журналы санала. Башка финанс басмалары арасында “EuroWeek”, “Global Agenda” (Бөтенсоюз икътисад форумының махсус басмасы), “Capital Markets Guide”, “LatinFinance”, “International Equity Review”, “Project&Trade Finance”, “AsiaMoney”, “International Financial Law Review”, “AsiaLaw” һәм башка журналлар бар.
1997 елда «Евромани» компаниясе АКШ та иң эре финанс басмасы булып исәпләнгән “Institutional Investor” журналын сатып ала, шул рәвешчә, америкалы инвестор һәм финансистлар аудиториясенә үтеп керү юлын таба: 1999 елда онлайн режимында мәгълүмати хезмәт күрсәтүгә махсуслаштырылган “Internet Securities Inc.” компаниясен үзенә карата.
Бу төркемгә шулай ук финанс тематикасы буенча конференцияләр оештыру (ел саен “Евромани” дөньяның төрле илләрендә 50 дән артык конференция оештыра), китаплар бастыру, семинарлар үткәрү белән шөгыльләнә торган бүлекчәләр дә керә.