Татарстанда Bombardier компаниясе җитештергән очкычларга техник хезмәт күрсәтү базасы киңәйтелә

Татарстанда үткән елның августыннан эшли торган Bombardier Канада компаниясе җитештергән очкычларга хезмәт күрсәтү буенча Россиядә икенче сервис үзәге үз мөмкинлекләрен киңәйтә. Дөньяда очкычлар һәм поездлар җитештерү буенча танылган компания “Тулпар Техник” ҖЧҖ белән тиешле килешүгә кул куйды.
Килешүгә кул кую тантанасы бүген ТР Хөкүмәте Йортында ТР Премьер-министры Илдар Халиков катнашында узды.
Документ нигезендә Татарстан компаниясе базасында Татарстан һәм Идел буе төбәгендә эксплуатацияләнә торган Challenger 300 һәм Challenger 850 тибындагы очкычларга техник хезмәт күрсәтү станциясе булдырыла.
Моңа кадәр “Тулпар Техник” Bombardier сервис үзәге буларак CRJ 100 һәм CRJ 200 очкычларына техник хезмәт күрсәткән.
Bombardier һәм “Тулпар Техник” ҖЧҖ арасындагы килешүнең әһәмияте турында сөйләгәндә, ТР Премьер-министры сервис үзәгенең мөмкинлекләрен киңәйтү төбәктә Универсиадага бәйле һава юллары ярдәмендә пассажирлар ташуның артуы, шулай ук Идел буе федераль округында төбәк һава юллары ярдәмендә пассажирлар ташу буенча проектны эшләтеп җибәрү шартларында аеруча мөһим, дип билгеләде. “Бүген имзаланган килешү ТРда һәм Идел буе төбәгендә авиацияне тагын да югарырак дәрәҗәгә күтәрергә мөмкинлек бирер, дип өметләнәм”, - диде Илдар Халиков.

Килешүгә кул куйганнан соң, журналистларга Bombardier Aerospace компаниясенең заказ ясаучыларга хезмәт күрсәтү буенча президенты Эрик Мартель сөйләвенчә, дөньяда барлыгы 65 авторлаштырылган сервис үзәге бар, аларның 2се – Россиядә (Мәскәү һәм Татарстан). Компаниянең РФдә сервис үзәкләрен арттыру буенча планы юк, ләкин, Эрик Мартель сүзләренчә, булган структуралар хезмәт күрсәтә торган очкычларның модельләре исемлеген арттыру планлаштырыла.

Очкычларга техник хезмәт күрсәтү буенча “Тулпар Техник” базасы “Казан” халыкара аэропортында урнашкан. Предприятиедә 13 техник һәм 7 механик эшли. Казан аэропортындагы ангардан кала, «Бегишево»да тагын бер төзелгән. Инфраструктура төзелешенә, җиһазлар сатып алуга һәм белгечләрне укытуга киткән инвестицияләр күләме якынча 25 млн. доллар булган.

“Тулпар Эйр” авиакомпаниясе һәм “Тулпар Техник” ҖЧҖ Директорлар советы рәисе Азат Хәким сүзләренчә, хәзерге вакытта "Тулпар Техник” бизнеска юнәлгән очкычлардан кала, төрле авиакомпаниянең якынча 20 коммерцияле очкычына хезмәт күрсәтә, якын арада аларның саны 50гә кадәр артырга тиеш.