Шамил Гафаров: эш урынында имгәнү очраклары буенча 2012 ел нәтиҗәләре бик начар

Бүген Татарстан Республикасы Министрлар Кабинетында видеоконференция режимында Хезмәтне саклау буенча республика ведомствоара комиссиясенең киңәйтелгән утырышы узды, анда 2012 ел нәтиҗәләре буенча Татарстанда эш урынында имгәнүләр дәрәҗәсе һәм аларны киметү өчен күрелә торган чаралар хакында сөйләшенде. Утырышны Татарстан Республикасы Премьер-министр урынбасары – Министрлар Кабинеты Аппараты җитәкчесе Шамил Гафаров алып барды.

Татарстанстат белешмәләре буенча, 2012 елда Татарстанда хезмәт урынында 101 кеше һәлак булган, җитди имгәнүчеләрне дә санап, барлыгы 865 кеше зыян күргән. Шуңа кадәрге 2011 елда исә 113 кеше эш урынында һәлак булган, зарар күрүчеләр 981 булган. Шул рәвешле, 1000 эшләүчегә исәпләгәндә, эш урынында бәхетсезлеккә очрау дәрәҗәсе 1,3 булган, 2011 елда – 1,5. Идел буе федераль округында андый бәхетсезлек очраклары буенча Татарстан 6 нчы урында булса, бәхетсезлек фаҗига - кеше үлеме белән тәмамланулар буенча округ һәм РФ буенча республика лидерлыкта: 1000 эшләүчегә - 0,152.
Утырышта ТР хезмәт, мәшгульлек һәм социаль яклау министры Айрат Шәфигуллин доклад ясады.
А.Шәфигуллин сүзләренчә, былтыр Татарстанда эш урынында 1231 кеше каза күргән, 111е өчен һәлакәт үлем белән тәмамланган.
Министр билгеләп үткәнчә, кече һәм урта бизнес өлкәсе генә түгел, эре предприятиеләрдә дә һәлакәт очраклары күп. 1000 кешегә исәпләгәндә, хезмәт урынында һәлакәт үлемгә китерү дәрәҗәсе югары булганнардан Баулы районында, мәсәлән, - 4,4, Нурлат районында – 1,5, Ютазыда – 1,4, Бөгелмәдә – 0,9, Буада – 0,6, Әлмәттә – 0,15, Казанда – 0,089 (былтыр 18 кеше эштә һәлак булган, 2011 елда – 49), Чаллыда – 0,15 (былтыр 15 һәм 2011 елда 11 кеше эш урынында һәлак булган).

Бу мәсьәләдә Шамил Гафаров, һәлакәт нәтиҗәләренә генә бөтен игътибар бирелә, ә шуңа китергән сәбәпләр күләгәдә кала, диде.
Айрат Шәфигуллин исә, иң күпчелек очракта төп сәбәп – предприятиеләрдә оештыру эшләре тиешле дәрәҗәдә булмау, дип җаваплады.
ТР Хезмәт, мәшгульлек һәм социаль яклау министрлыгына һәлакәтләрне киметү мәсьәләсендә тәкъдимнәр әзерләп, шуның буенча аерым җыелыш үткәрергә, ТР Сәүдә һәм сәнәгать министрлыгына хезмәт сакланышы мәсьәләсендә тармаклар буенча методик кулланмалар әзерләп, министрлыкларга таратырга тәкъдим итте. Эш урынында куркынычсызлык проблемасы муниципалитет башлыкларына да турыдан-туры кагыла, дип кисәтте һәм алардагы уңай тәҗрибәне уртаклашырга чакырды. Татарстанда эш урынында имгәнү очраклары буенча 2012 ел нәтиҗәләре бик начар, дип йомгаклады Ш.Гафаров.