Илдар Халиков IТ-лицейда булды

Бүген ТР Премьер-министры Илдар Халиков Казандагы IТ-лицейда булды. ТР Хөкүмәт башлыгы лицейның эшчәнлеге белән танышты һәм укучылар белән аралашты.
Илдар Халиков беренче башлап, укучыларның фәнни-практик эшчәнлекләре кысаларында эшләгән проектлары белән танышты.
Шулай ук Илдар Халиков уку классларын,лабораторияләрне, IT-лицейның торак корпусын карап чыкты. Актлар залында ул укучылар белән аралашты, аларның сорауларына җавап бирде.

Илдар Халиков фикеренчә, әлеге проектлар мәгълүмат технологияләрен конкрет бурычларны хәл итүгә юнәлдерүләре, актуаль булулары белән әһәмиятле. Ул бүген үк кулланылышка кертеп булырлык проектларны аерым билгеләп үтте. “Аларның кулланылышка кертелүе башка проектлар авторларын стимуллаштырырга ярдәм итәчәк”, -диде ул.
Соңрак Премьер-министр укучыларның инде бүгеннән үк кулланылышка кертә алырлык өч проектын атап үтте. Аларның берсе - светофорлар белән автоматлаштырып идарә итүгә, икенчесе автомобиль якынлашканда урам фонарьларын автоматик рәвештә яктыртуга кагыла. Өченчесе - IТ-лицеенда эшләнгән янгын куркынычсызлыгы кагыйдәләренә өйрәтү программасы.
.
Булачак мәгълүмат технологияләре белгечләре, Татарстанда эшләү өчен лаеклы эш шартлары белән кызыксындылар. Премьер-министр мондый шартларның инде хәзер үк тудырылуын белдерде. Инде бүген үк компанияләр мәгълүмат технологияләре өлкәсендә эшләүче белгечләргә кытлык кичерә һәм аларны кабул итәргә әзерләр
.
Очрашуда укучылар,үзләренең проектлары буенча авторлык хокукларын яклау мәсьәләсен дә күтәрделәр. Хөкүмәт башлыгы ТР Мәгариф һәм фән министрлыгына бу мәсьәләне өйрәнергә кушты.

Премьер-министр очрашуны йомгаклап, лицей укучыларын укудан, фәнни эшчәнлектән тыш, аларны мәдәни чараларга да йөреп, күбрәк аралашып, кызыклы тормыш белән яшәргә өндәде.