Татарстан Республикасы Икътисад министрлыгы һәм “Турк Капитал Холдинг” компаниясе арасында хезмәттәшлек турындагы Килешүгә кул куелды

Бүген Татарстан Республикасы Министрлар Кабинетында Татарстан Республикасы Икътисад министрлыгы һәм “Турк Капитал Холдинг” компаниясе арасында хезмәттәшлек турындагы Килешүгә кул куелды.
Документка Татарстан Республикасы Икътисад министрлыгы ягыннан – Марат Сафиуллин, “Турк Капитал Холдинг” ягыннан компаниянең башкаручы директоры Фәваз К. Әл-Исса (Fawaz K. Al-Issa) кул куйды.
Кул кую церемониясендә Татарстан Премьер-министры Рөстәм Миңнеханов катнашты. Аның сүзләренә караганда, килешү республика белән “Турк Капитал Холдинг” компаниясе арасында ике як өчен дә файдалы булган хезмәттәшлек турында алдан сөйләшенгән нәрсәләрне тормышка ашыруда беренче адым булды.
Фәваз Әл-Исса әфәнде “Турк Капитал Холдинг” “Кувейт Финанс Йорты” ның (KFH - Kuwait Finance House) бүлендек компаниясе булуын, аның устав капиталы 150 млн. АКШ доллары тәшкил итүен искәртеп үтте.
“Турк Капитал Холдинг” эшчәнлегенең төп юнәлеше – Төркия, Казахстан, Азәрбайҗан, башка ислам илләре территорияләрендә тормышка ашырыла торган проектларга инвестицияләр кертү.
Татарстанның икътисад министры Марат Сафиуллин бүгенге көндә кайбер перспектив проектларга капитал салу өчен ислам финансларыннан файдалануның республика өчен кызыклы булуын билгеләп үтте. Аның сүзләренә караганда, “Турк Капитал Холдинг” (75 %) һәм Татарстан Республикасы (25 %) катнашында уртак предприятие төзү турында килешенгән иде инде. Аның устав капиталы якынча 10 млн. АКШ доллары тәшкил итәчәк.
Киләчәктә уртак предприятие Татарстан Республикасының девелопер базарын үстерүгә ярдәм итәр дип уйланыла (“Миллениум Зилант Сити компаниясе белән берлектә Казансу елгасының уң ярында төзү проекты).
Моннан тыш, Татарстан Республикасы Премьер-министры Рөстәм Миңнеханов “Турк Капитал Холдинг” компаниясе җитәкчелегенә Казанда 2013 ел Универсиадасына хәтле төзеләчәк объектларга (кунакханәләр, спорт корылмалары) турыдан-туры капитал салу мөмкинлеген карарга тәкъдим итте. “Без проектларыбызга кредит биреп кенә калмыйча, капитал салуда да катнашучы чит ил инвесторларына ярдәм итәргә әзер”, - диде ул.

Белешмә өчен:

Кувейт Финанс Йорты (KFH - Kuwait Finance House) Кувейтта 1977 елда төзелә. Бүгенге көндә KFH кулланучылар банкингы, милек һәм лизингны финанслау, турыдан-туры инвестицияләр һәм инвестиция портфельләре кебек шәригать банк хезмәтләре тәкъдим итә. Кувейт Финанс Йортының Азия төбәгендә вәкиллекләре бар. 1989 елда Кувейт Финанс Йорты Төркиягә килә.
Төркия Хөкүмәте белән (паритетлы нигездә) Кувейт Финанс Йорты гомуми активлары 4 млрд. доллар күләмендә бәяләнгән банк оештыра.
Соңрак 150 млн. доллар күләмендәге устав капиталы булган “Турк Капитал” компаниясе төзелә.