Рөстәм Миңнеханов: “Чистай үсешенең яңа чорына нигез салабыз”

2013 елның 4 мае, шимбә
ТР Президенты Рөстәм Миңнеханов бүген Чистай районына эш сәфәре барышында төзелеп килүче “Чистай” индустриаль паркы территориясендәге беренче 2 предприятие нигезенә таш салуда катнашты. 
Исегезгә төшерәбез, биредә индустриаль парк проекты шәхси-дәүләт партнерлыгы шартларында ТР Хөкүмәте тарафыннан расланган комплекслы инвестиция планы һәм Чистайны үстерү буенча 2015 елга кадәр исәпләнгән максатчан программа кысаларында гамәлгә ашырыла. Кече шәһәрләргә ярдәм буенча федераль программа кысаларында әлеге проектны финанслауга 592 млн сум бүленгән.
Индустриаль паркның гомуми мәйданы 292 гектар. Бүгенге көндә аның территориясендә 1-13 гектар мәйдандагы 35 участок межаланган. Участокларга кирәкле коммуникация үткәрелгән, аларга индустриаль парк резидентлары түләүсез ялгана ала. Алар шулай ук төзелеш чорында һәм предприятие проект куәтенә чыкканчы (7 елга кадәр) җир салымыннан, җиргә аренда түләвеннән азат ителә. Резидентлар өчен милек салымы белән керем салымы да киметелә.
Бүгенге көндә индустриаль парк территориясендә 4 компания-инвестор белән производстволар төзүгә кагылышлы килешүләр имзаланган. Инвестицияләрнең гомуми күләме 12 млрд сумга якын. Бу производстволарда эш урыннары саны 1 меңнән артык кешегә исәпләнгән. 
Президент беренче ике заводның нигезенә киләчәк буыннарга мөрәҗәгать язылган капсулалар салу тантанасында катнашты. Әлеге заводларның берсе - “Дельрус” халыкара фәнни-җитештерү компаниясенең медицина кулланылышындагы эшләнмәләр җитештерү буенча махсуслашкан производствосы, икенчесе -“СКД Инвест” ҖЧҖ аз катлы төзелешләр өчен комплектлар җитештерү производствосы булачак. 
ТР Президенты тантанада ясаган чыгышында билгеләп үткәнчә, республика Хөкүмәте элек тә Чистай районына инвесторлар җәлеп итү буенча омтылышлар ясаган, әмма ул вакытта алар уңышлы тәмамланмаган. Моношәһәрләргә ярдәм буенча федераль программа кабул ителгәч кенә вазгыять үзгәргән. Әлеге программа индустриаль парк төзелешен башларга мөмкинлек биргән. 
ТР башлыгы фикеренчә, беренче ике проектның уңышлы гамәлгә ашырылуы мөһим, яңа резидентларның килүе шуннан торачак. “Чистай эшләүчеләр саны, һөнәри дәрәҗәсе буенча конкурентлы шәһәр: ул географик яктан бик уңайлы урында урнашкан”, -ди Рөстәм Миңнеханов.Ул инвесторларга республика һәм муниципалитет җитәкчелегенең кирәкле ярдәм күрсәтәчәген ышандырды. “Проектларыгызның уңышы өчен без сезнең белән тигез дәрәҗәдә җаваплы. Без сезнең белән Чистай үсешенең яңа чорына нигез салабыз. Шәһәр шундый проектларга мохтаҗ”, - дип басым ясады ТР Президенты. 
ТР Президентын эш сәфәрендә ТР Премьер-министрының беренче урынбасары Равил Моратов һәм вице-премьер-авыл хуҗалыгы һәм азык-төлек министры Марат Әхмәтов озатып йөрде. 
Тантанага кадәр Президент Чистай районы авыл җирлекләре башлыклары һәм авыл хуҗалыгы предприятиеләре җитәкчеләре белән очрашты. Район башлыгы Илдус Әхмәтҗанов төбәктә язгы чәчү кампаниясен 15 майга кадәр төгәлләргә планлаштыруларын җиткерде.
“Татар-информ” ИА
ВИДЕОРЕПОРТАЖ Фоторепортаж
БАРЛЫК ЯҢАЛЫКЛАРНЫ УКУ
ЯҢАЛЫКЛАРГА ЯЗЫЛУ
Хөкүмәт
Документлар
Матбугат хезмәте
Гражданнар мөрәҗәгатьләре һәм аларны кабул итү
Чаралар
Контакт
Адрес: 420060, Казан шәһәре, Ирек мәйданы, 1
Телефон: +7 (843) 264-77-74
E-Mail: prav@tatar.ru
Сорау бирү
Обычная версия
Сайттагы барлык материаллар лицензия буенча тәкъдим ителә:
Creative Commons Attribution 4.0 International