2013 ел Универсиадасына Татарстанның башкаласында биеклеге 300 метрдан артык булган яңа телебашня төзергә уйлыйлар

Бүген Татарстан Республикасы Министрлар Кабинетында булып узган очрашуда республика Премьер-министры Рөстәм Миңнеханов һәм “Рәсәй теле- һәм радиотапшырулар челтәре” Федераль дәүләт унитар предприятиесенең генераль директоры Геннадий Скляр Казанда яңа телебашня төзү проекты һәм Татарстан Республикасында цифрлы телевидениене үстерү мәсьәләләре турында фикер алыштылар.
Очрашуда шулай ук Татарстан Республикасы мәгълүматлаштыру һәм элемтә министры Фәрит Фазылҗанов, Казан мэры Илсур Метшин, Татарстан Республикасы төзелеш, архитектура һәм торак-коммуналь хуҗалык министры урынбасары Ирек Фәйзуллин, “Татарстан Республикасы Мәгълүмати технологияләр үзәге” Дәүләт учреждениесенең генераль директоры Николай Никифоров, “Рәсәй теле- һәм радиотапшырулар челтәре” филиалы – Татарстан Республикасының Радиотелетапшырулар үзәге” директоры Владимир Якимов һәм башкалар катнашты.
Журналистларга Геннадий Скляр хәбәр иткәнчә, яңа цифрлы технологияләрнең үсеше, республиканы цифрлаштыру ихтыяҗы Татарстан башкаласында яңа телебашня төзүнең бер аргументы була.
“Бөтендөнья һәм Рәсәй тәҗрибәсенә анализ ясап, без Татарстан Республикасы һәм шәһәр җитәкчелегенә телевидение башнясын гына түгел, ә медиасити дип атала торган тулы бер комплекс төзергә тәкъдим иттек, - диде Геннадий Скляр. – Бу комплекста телебашня технологик функцияләр генә башкарып калмыйча, туристик, эшлекле объектка һәм сәүдә-күңел ачу үзәгенә, шәһәрнең үзенә күрә бер символына әйләнәчәк.
Яңа телебашняның биеклеге 300 метрдан артык булыр дип исәп тотыла.
Бик биек әлеге объектны урнаштыруның инде хәзер үк берничә варианты бар, ләкин, Скляр әфәнденең фикеренә караганда, Троицк урманындагы мәйданчык (14 га тирәсе) аеруча зур кызыксыну тудыра.
“Без проектны Казанда узачак 2013 ел Универсиадасына тормышка ашырырга телибез, - дип билгеләп үтте Геннадий Скляр, төзелешнең сроклары турындагы сорауларга җавап биреп. – Бүген без эшне башларга дип килештек, һәм мин шушы айларда беренче караламаларны тәкъдим итә алырбыз дип уйлыйм. Алга таба алар турында фикер алышу булачак. Троицк урманындагы мәйданчыкка килгәндә, бу мәсьәләдә Казан мэры минем тәкъдимемне хуплады. Бу янәшәдәге бөтен территориянең үсешенә импульс бирер дип уйлыйбыз. Казандагы бу җир кишәрлеген без, проектны тормышка ашыру өчен, инвесторга бирә алыр идек”.
Якынча проект 4 млрд. сумга бәяләнә, шуның белән бергә телебашня үзе 1,5 млрд. сум торачак.
“Калганы проект комплексында республика һәм шәһәр җитәкчелеге, шулай ук бу җитди проектка акча салачак инвесторларның нәрсә күрергә теләүләреннән торачак, - дип саный Скляр әфәнде.
Аның сүзләренә караганда, проект, хосусый-дәүләти партнерлык шартларында, төрле чыганаклардан финансланачак. Геннадий Скляр хәбәр иткәнчә, шәхси инвесторларны җәлеп итеп, мондый төрдәге телебашнялар төзү тәҗрибәсе Рәсәйдә бар инде (Екатеринбург, Волгоград).