Линар Якупов:”Индонезия Татарстан белән хезмәттәшлек итүгә кызыксыну белдерә”

Индонезия Татарстан белән хезмәттәшлек итәргә тели. Бу хактаТР Хөкүмәт Йортында узган брифингта ТР Инвестицион үсеш агентлыгы җитәкчесе Линар Якупов хәбәр итте. Журналистларның сорауларына шулай ук ТР Сәүдә-сәнәгать палатасы рәисе Шамил Агеев җавап бирде.

Искә төшерәбез, 2 май көнне ТР Президенты Рөстәм Миңнеханов җитәкчелегендәге Татарстан делегациясе Индонезиядә булды.Эш сәфәре барышында делегация вәкилләре Индонезиянең Сәнәгать, Энергетика министрлыгы җитәкчелеге, Джакартада белем алучы Татарстан студентлары белән очрашкан, шулай ук Индонезиянең Сәүдә-сәнәгать палатасында узган түгәрәк өстәл утырышында катнашкан.

Индонезиядә шулай ук эшмәкәрләр арасындагы хезмәттәшлекне җайга салу максаты белән, Татарстан һәм Индонезия Сәүдә-сәнәгать палаталары арасында килешү төзелгән.

Линар Якупов әйтүенчә, Индонезиягә сәфәр кысаларында хәләл продукция җитештерү мәсьәләсе буенча да фикер алышу булган. Анда 240 миллионга якын мөселман яшәвен исәпкә алганда, ислам кануннарына туры килүче азык җитештерү буенча махсуслашкан ширкәтләр бик күп. “Алар үз мөселманнары өчен генә түгел, тирә-як күрше ил мөселманнары өчен дә хәләл продукция җитештерү белән шөгыльләнә. Ике ел рәттән индонезиялеләр “Казан-Хәләл” күргәзмәсендә актив катнашты.

Татарстанның Индонезия белән хезмәттәшлек нәтиҗәләре дә бар. Мисал өчен, КВЗ Индонезиягә 12 машина җибәргән, Индонезия пилотларын өйрәткән һәм хәзер яңа заказларга әзер. “КАМАЗ” Индонезия өчен уң як руль белән җиһазланган йөк машиналарының беренче партиясен әзерләгән, киләчәктә җыю производствосын ачып җибәрү ниятләнә. Горький исемендәге заводның суднолар экспозициясе дә Индонезия дәүләтендә кызыксыну тудырган.

Линар Якупов билгеләвенчә, Индонезия Россия белән тулысынча, Татарстан белән өлешчә сәүдә мөнәсәбәтләрен үстерүгә зур кызыксыну күрсәткән.