ТР Премьер-министры Арча зиратында хәрби каберлекләргә чәчәкләр салды

Бүген, Җиңү бәйрәмендә, гадәттәгечә Казанның Арча зиратында, Бөек Ватан сугышында ятып калган батырлар һәйкәлләренә һәм хәрби каберлекләргә чәчәкләр салу һәм венок кую тантанасы булды. Бу тантанада ТР Премьер-министры Илдар Халиков,ТР Президент Аппараты җитәкчесе Юрий Камалтынов, ТР Премьер-министры урынбасары – ТР Министрлар Кабинеты Аппараты җитәкчесе Шамил Гаффаров, ТР Президент Аппараты җитәкчесе урынбасары – ТР Президентының эчке сәясәт мәсьәләләре буенча департамент башлыгы Александр Терентьев, Казан Башкарма комитеты җитәкчесе Алексей Песошин, Бөек Ватан сугышы ветераннары, шул исәптән, Советлар Союзы Геройлары – Сабир Әхтәмов һәм Борис Кузнецов катнашты.

Тантанада катнашучылар 1941-1945 нче еллардагы сугыш көннәрендә Ватан азатлыгы һәм бәйсезлеге өчен һәлак булган хәрбиләргә мәңгелек истәлек монументына чәчәкләр салдылар. Мәрхүм батырлар бер минут тынлык белән искә алынды һәм коралдан өч тапкыр ату яңгырады.

Шулай ук Советлар Союзы Герое, танылган очучы Михаил Девятаев һәм Казан халык депутатларының шәһәр советы башкарма комитетының элеккеге рәисе, сугышта катнашкан Александр Бондаренко каберләренә дә чәчәкләр куелды. Бүген аның каберенә тормыш иптәше Энгелина Бондаренко һәм оныгы Екатерина Сверчкова килгән иде. Илдар Халиков мәрхүмнең туганнары белән күрешеп, берничә сүз алышты.