Татарстан Республикасы Хөкүмәте

Татарстан Президенты Россиядәге Германия илчесе белән очрашты

2013 елның 13 мае, дүшәмбе

Татарстан Президенты Рөстәм Миңнехановның Германия Федератив Республикасының Россиядәге Гадәттән тыш һәм Тулы вәкаләтле илчесе Ульрих Бранденбург белән очрашу бүген Казан Кремлендә узды. Очрашуда шулай ук вице-премьер – ТР сәнәгать һәм сәүдә министры Равил Зарипов, ТР Президентының халыкара мәсьәләләр буенча ярдәмчесе Радик Гыйматдинов катнаштылар.

Очрашу башында Рөстәм Миңнеханов 2010 елның сендябрь аенда үзенең Германия илчесенә Казанда ГФР виза үзәген ачу үтенече белән мөрәҗәгать иткәнен искә төшерде.

“Һәм бүген бу вакыйга узачак, - дип шатланып әйтте Татарстан Президенты. – Шундый үзәкнең барлыгы безнең киләчәк багланышларны ныгытыр, безнең проектларны алга таба этәрүгә, туризмның үсешенә, белем бирү программаларына, бизнеска ярдәм итәр дип уйлыйбыз”.

ТР Президенты Татарстан белән Германия арасындагы хезмәттәшлек ныгуына кәнәгать булуын белдерде. ГФР белән Татарстан арасындагы товар әйләнеше узган елны 1,5 млрд. евро тәшкил итте. ГФРннан республикада җыелган инвестицияләр күләме 1,3 млрд. евро тәшкил итә. Моңа иң яхшы мисал, Рөстәм Миңнеханов фикеренчә, КАМАЗ белән Daimler Германия компаниясе арасындагы хезмәттәшлек.

"Алабуга" МИЗда Германия белән бәйләнештәге 6 компания теркәлгән. Барысы Татарстанда Германиядән 71 предприятие эшләп килә. Рөстәм Миңнеханов хәбәр иткәнчә, республикада Siemens, Knorr-Bremse, ZF, Voith, Basf актив эшләп киләләр. Татарстан банклары һәм предприятиеләренең Германия банклары белән багланышлары бар, ТРда немец сәүдә челтәрләре бик популяр. "Ак Барс Аэро" авиакомпаниясенең Мюнхенга туры рейслары бар. "Кызганычка каршы, Lufthansa Казанга рейсларны туктатты. Ләкин мин бу мәсьәләгә янә кайтасы булыр дип уйлыйм", - дип белдерде Татарстан Республикасы Президенты.

Ул шулай ук мәгариф учреждениеләренең Германия хезмәттәшләре белән багланышлар булуын искә төшерде. Татарстан Президенты фикеренчә, фән һәм мәгариф өлкәсендә хезмәттәшлек бик мөһим, ә студентларны алмашу киләчәк эшлекле бәйләнешләргә ярдәм итәчәк.

“Без Туполев исемендәге КМТТУ нигезендә яңа технологияләр Россия-Германия университетын оештыруга зур өметләр баглыйбыз, - дип әйтте Р.Миңнеханов. – Татарстан өчен техник белгечлекләр бик мөһим, ә Германиянең заманча техник кадрлар әзерләү буенча тәҗрибәсе бик зур”.

Рөстәм Миңнеханов фикеренчә, тагын бер Германия һәм Татарстан Республикасы арасындагы хезмәттәшлекнең мөһим юнәлеше сәламәтлекне саклау булып тора. Ул медицина учреждениеләре арасында хезмәттәшлекне ныгытырга өндәде.

Рөстәм Миңнеханов Германия ягына Болгар һәм Свияжск кандидатураларын ЮНЕСКО Бөтендөнья мирасы исемлегенә кертү буенча киләчәк тавыш бирүдә хуплауларын сорады.

ТР Президенты искә төшерде, быел Казанда июль аенда Универсиада узачак, 2015 елда – су спорт төрләре буенча дөнья чемпионаты, 2018 елда – футбол буенча дөнья чемпионаты. "Ышанам ки, Германия спортчылары барлык бу ярышларда яхшы нәтиҗәләр күрсәтәчәкләр", - дип әйтте Р.Миңнеханов.

Хезмәттәшлекнең перспективалы юнәлешләре арасында Рөстәм Миңнеханов Германия компанияләренең Иннополис һәм “Смарт Сити” проектларында катнашуын атады. Германия Федератив Республикасының Россиядәге Гадәттән тыш һәм Тулы вәкаләтле илчесе Ульрих Бранденбург виза үзәген ачудан тыш, хезмәттәшләре белән бергә бүген Туполев исемендәге КМТТУга да барачагын әйтте. "Дүрт атна элек алар уртак университет оештыру турында Германия академик алмашулар хезмәте белән килешү имзаладылар. Бу Россиядә беренче шундый тәҗрибә, һәм мин Татарстанда моның өчен бөтен шартлар бар дип уйлыйм", - дип белдерде илче.

Рөстәм Миңнеханов һәм Ульрих Бранденбург белгечләр әзерләү мәсьәләсе турында сөйләштеләр. Илче сүзләренчә, чит ил инвесторлары өчен әзерлекле белгечләр булу мөһим. Татарстан Президенты үз чиратында республика җитәкчелегенең әлеге юнәлештә ниләр эшләгәне хакында сөйләде.

Ульрих Бранденбург шулай ук Рөстәм Миңнехановтан Татарстанда туризмны үстерү буенча планнар турында сорашты. Илче хәбәр иткәнчә, Германия туристлары Россиядә елга круизларын яраталар, ә Татарстан Президенты үз чиратында Казан, Болгар һәм Свияжскның круизлар кысаларында карарга кызыклы булуы турында әйтте.

Очрашу ахырында Рөстәм Миңнеханов Ульрих Бранденбургка Татарстан һәм Германия арасындагы хезмәттәшлек проектларына ярдәм иткәне өчен рәхмәт белдерде. "Сезнең килүегез бик вакытлы, мин сәфәрегез уңышлы һәм нәтиҗәле булыр дип ышанам”, - дип илчегә мөрәҗәгать итте Татарстан Республикасы Президенты.

ТР Президенты Матбугат хезмәте

БАРЛЫК ЯҢАЛЫКЛАРНЫ УКУ

СОҢГЫ ЯҢАЛЫКЛАР

май, 2026 ел

ТР Хөкүмәте Йортында узган брифингта Татарстанның Җиңү көнен ничек билгеләп үтәчәге турында сөйләделәр

Бүгенге көндә Татарстанда 1941-1945 еллардагы Бөек Ватан сугышының соңгы шаһитлары булган 92 фронтовик яши. Ветераннарга ярдәм чаралары һәм республиканың Җиңү көнен - 9 Майны ничек билгеләп үтәчәге турында Татарстан Республикасы Министрлар Кабинетында узган брифингта сөйләделәр.

апрель, 2026 ел

ТР экология һәм табигый байлыклар министры Азат Җиһаншин санитар-экологик ике айлыкның арадаш йомгакларын тәкъдим итте

Бүген Татарстан экология һәм табигый байлыклар министры Азат Җиһаншин Татарстан Республикасы Хөкүмәте Йортында узган киңәшмәдә санитар-экологик ике айлыкның арадаш нәтиҗәләре турында сөйләде. Киңәшмәне Татарстан Рәисе Рөстәм Миңнеханов уздырды, видеоконференцэлемтә режимында киңәшмәдә республиканың барлык муниципаль районнары катнашты.

Татарстанда 24 муниципалитетта 296 күп фатирлы йортка капиталь ремонт ясауга керешкәннәр, барлыгы 706 күп фатирлы йортка ремонт ясалачак

Татарстан Республикасында 24 муниципаль берәмлектә 296 күп фатирлы йортка капиталь ремонт ясауга керешкәннәр. Быел 41 муниципаль берәмлектә барлыгы 706 күп фатирлы йортка капиталь ремонт ясалачак. 6 муниципаль берәмлектә 44 йортта 99 лифт алмаштыру каралган. Мондый мәгълүматларны бүген ТР Хөкүмәте Йортында узган киңәшмәдә ТР төзелеш, архитектура һәм торак-коммуналь хуҗалык министры Марат Айзатуллин китерде. Киңәшмәне Татарстан Рәисе Рөстәм Миңнеханов үткәрде. Бүген киңәшмәдә Еврей автономияле өлкәсеннән (ЕАӨ) коллегалар катнаша – бу өлкәдән делегация тәҗрибә уртаклашу өчен республикага эш сәфәренә килгән.

апрель, 2026 ел

Казанга Кытай Халык Республикасы Оборона министры Дун Цзюнь килде

Бүген Казанга Кытай Халык Республикасы (КХР) Оборона министры дун Цзюнь килде. Г. Тукай исемендәге «Казан» халыкара аэропортында кунакны Татарстан Республикасы Премьер-министры Алексей Песошин, КХРның Казандагы Генераль консуллыгы вәкилләре, башка рәсми затлар каршы алды.

ЯҢАЛЫКЛАРГА ЯЗЫЛУ