Рөстәм Миңнеханов һәм Леонид Меламед Татарстанда наноиндустрияне финанслау буенча ведомствоара эшче төркем эшендә катнаштылар

Бүген Татарстан Республикасы Хөкүмәте башлыгы Рөстәм Миңнеханов Татарстан Республикасы Министрлар Кабинетында “Нанотехнологияләрнең Рәсәй корпорациясе” (“Роснанотех”) дәүләт корпорациясе генераль директоры Леонид Меламед белән очрашу үткәрде.
Анда Татарстан Республикасы һәм “Роснанотех” корпорациясенең наноиндустрияне үстерү өлкәсендәге хезмәттәшлеге турында сүз барды.
Аннан соң Татарстан Республикасы Премьер-министры һәм “Роснанотех” корпорациясе башлыгы Татарстанда наноиндустрияне финанслау буенча ведомствоара эшче төркем эшендә катнашты.
Утырышта шулай ук республиканың югары уку йортлары, Татарстан Республикасы Фәннәр академиясе вәкилләре, эшкуарлар һәм техник белгечләр бар иде.
Утырышны ачып, Татарстан Республикасы Премьер-министры түбәндәгеләрне искә төшерде: бүгенге көндә Рәсәй Хөкүмәте наноиндустриянең үсешенә зур әһәмият бирә - билгеләнгән бюджеты булган федераль максатчан программа кабул ителде, дәүләт корпорациясенә нигез салынды. Үз чиратында, Татарстан да нанотехнологияләр үсешендә катнашырга ниятли. Моның өчен аның җитди интеллектуаль потенциалы, фәнни-тикшеренү базасы бар.
“Роснанотех” башлыгы Леонид Меламед ведомствоара эшче төркем әгъзаларына дәүләт корпорациясен тәкъдир итте.
Искә төшереп узыйк: “Нанотехнологияләрнең Рәсәй корпорациясе”нә, нанотехнологияләр өлкәсендә дәүләт сәясәтен тормышка ашыру өчен, 2007 елда нигез салына. Әлеге мәсьәләне хәл итеп, корпорация шактый зур икътисади һәм социаль потенциал белән нанотехнология проектларында инвестордаш буларак катнаша. Проектларның башлангыч чорында финанс яктан катнашып, корпорация үз партнерлары – хосусый инвесторларның тәвәккәллек куркынычын киметә.
Леонид Меламед сүзләренә караганда, якындагы алты елда нанотехнологияләр кулланып җитештерелгән товарлар базарының күләме якынча 3 трлн. сум тәшкил итәр, шул ук вакытта базар ел саен 17 % үсешкә ирешер дип көтелә.
Рәсәй алдында 2015 елга дөнья базарында билгеле бер өлешне (3 % чамасы) яулап алу бурычы тора.
“Хәзергә Рәсәй, нанотехнологияләр кулланып, продукцияне күпләп җитештерү белән мактана алмый, ләкин безнең алда наноиндустриянең дөньякүләм лидерлары булган илләр рәтенә керү бурычы тора”, - диде Леонид Меламед.
Аның сүзләренә караганда, бүгенге көндә бу юнәлештә АКШ, Япония, Көньяк Корея, Германия лидер булып тора.
Рәсәйдә “Роснанотех” корпорациясенә хөкүмәт керткән льготалар күләме, Меламед әфәнде фикеренчә, уникаль һәм тиңдәшсез. “Бүген без эшкуарларны берничә елдан базарда ни булачагын алдан күрә белергә өйрәтергә тиешбез, - дип билгеләп үтте ул. – Наноиндустрия кысаларындагы бөтен проектларны дәүләт корпорациясе хосусый капиталны җәлеп итү юлы белән тормышка ашырачак”.
Татарстанда наноиндустрияне үстерүнең комплекслы проекты белән Татарстан Республикасының беренче вице-премьеры Борис Павлов таныштырды.
Бүген үк “Нанотехнологияләрнең Рәсәй корпорациясе” дип аталган дәүләт корпорациясенең генераль директоры Леонид Меламедны Татарстан Республикасы Президенты Минтимер Шәймиев кабул итәчәк. Очрашу кысаларында Татарстан Республикасы һәм “Нанотехнологияләрнең Рәсәй корпорациясе” дип аталган дәүләт корпорациясе арасында нанотехнологияләр һәм наноиндустрияне үстерү өлкәсендә хезмәттәшлек итү турындагы килешүгә кул куелыр дип уйланыла (документ 2015 елның 31 нче декабренә кадәр үз көчендә калачак).