Татарстан Хөкүмәте, “Берләштерелгән авиатөзелеш корпорациясе” ААҖ һәм Горбунов исемендәге Казан авиация җитештерү берләшмәсе килешүгә кул куячаклар

Бүген Татарстан Республикасы Премьер-министры Рөстәм Миңнеханов Мәскәүдә “Берләштерелгән авиатөзелеш корпорациясе” ААҖ президенты Алексей Федоров белән очрашты.
Очрашу барышында Татарстан Республикасы Министрлар Кабинеты, “Берләштерелгән авиатөзелеш корпорациясе” ААҖ һәм Горбунов исемендәге Казан авиация җитештерү берләшмәсе арасында Казан авиация җитештерү берләшмәсен үстерү өчен, өстәмә инвестицион ресурсларны җәлеп итүдә үзара ярдәм итешү турындагы килешүгә кул кую хакында сүз куештылар.
Горбунов исемендәге Казан авиация җитештерү берләшмәсенең финанс хәлен тотрыклыландыру буенча чаралар оештыру, төзелгән контрактларны үтәү өчен җитәрлек күләмдә финанслау һәм заводны техник яктан яңадан коралландыруга инвестицияләр җәлеп итү әлеге килешүнең темасы булып тора.
Татарстан Республикасы Министрлар Кабинеты Аппаратының сәнәгать бүлеге начальнигы Александр Володкевич хәбәр иткәнчә, килешүгә 12 нче августта, 12-15 нче август көннәрендә Казанда узачак “Авиакосмик технологияләр һәм җиһазлар 2008” халыкара махсуслаштырылган күргәзмәсен үткәрү кысаларында кул куелыр дип көтелә.

Белешмә өчен:

“Берләштерелгән авиатөзелеш корпорациясе” ААҖ составына “Сухой” Авиация холдинг компаниясе, “Иркут” корпорациясе” ААҖ, “Туполев” ААҖ, “Ильюшин” дәүләтара авиатөзелеш компаниясе, Комсомольск-на-Амуредагы Ю.А.Гагарин исемендәге авиация җитештерү берләшмәсе, “Сокол” Нижгар авиатөзелеш заводы, В.П.Чкалов исемендәге Новосибирск авиация җитештерү берләшмәсе, “Илюшин Финанс Ко.”, Финанс лизинг компаниясе керә.