Корабльләр төзелеше үзәге Казан милли тикшеренү техник университеты - КАИда ачылды

Бүген Туполев исемендәге Казан милли тикшеренү техник университеты-КАИда корабльләр төзелеше үзәге ачылды. Вузның өченче белем бирү корпусында узган тантанада ТР Премьер-министры Илдар Халиков, КМТТУ- КАИ попечительләр советы вәкилләре, университет җитәкчелеге һәм укытучылары катнашты.

Республика Хөкүмәте башлыгы кереш сүзендә билгеләгәнчә, күзәтү советының утырышында предприятие җитәкчеләрен студентларны профильле укыту үзәкләре булдырырга чакыру яңгыраган көннән бик аз вакыт үтте, ә бүген инде беренче нәтиҗәләр бар.

“Бу элеккеге яхшы традиция. Авиация тармагы предприятиеләре һәрвакыт мондый үзәкләр ачты, һәм нәкъ моның ярдәмендә Татарстан безнең авиация предприятиеләре өчен югары дәрәҗәле белгечләре булган төбәк булды”, - дип аерым алып ассызыклады И.Халиков.

Бүген ул инициатива күрсәтеп кенә калмаган, ә үзәк булдыруда ярдәм иткән А.М.Горький исемендәге Яшел Үзән заводының әһәмиятле адымын билгеләп үтте. “Бу шулай ук очраклы түгел. Бүген заводта заказлар проблемасы юк – заказлар берничә елга алдан ук билгеле. Россия генә түгел, ә дөнья базарында да актив сәясәт алып барыла. Хәзер алдагы көнгә квалификацияле кадрлар әзерләү мәсьәләсе тора”, - дип ассызыклады ТР Премьер-министры.

КМТТУ-КАИ ректоры Альберт Гыйльметдинов белдергәнчә, әлеге үзәкнең ачылышыннан соң, яңа чор башлана. “Без завод һәм предприятиеләрнең безнең вуз эчендә, ә без – завод эчендә булырга тиешлеген аңлыйбыз һәм ышанабыз”, - диде ул.

Уку йорты җитәкчесе шулай ук белем бирү үзәге ачылышы завод белән Казан милли тикшеренү техник университеты хезмәттәшлегенең беренче генә этабы булуын билгеләде. Алга таба университетның заводка төрле яктан, шул исәптән, фәнни-тикшеренү һәм конструкторлык эшләре белән ярдәм итүе планлаштырыла.

А.М.Горький исемендәге Яшел Үзән заводы генераль директоры Ренат Мистахов билгеләвенчә, КАИ базасында әлеге үзәкне ачуга киткән чыгымнар инде кайтарылган: монда alma mater тәмамлаган студентлар белем ала, кирәкле функцияләрне башкара алачак.

Тантаналы ачылыштан соң, Илдар Халиков һәм башкалар уку-укыту лабораторияләрендә булдылар.

Корабльләр төзелеше үзәге “Корабль төзелеше һәм океанотехника” юнәлеше буенча белем бирү процессында катнаша торган кафедраларны берләштерә. Әлеге белгечлек буенча 1 нче курста 15 студент, 2 нчедә 13 студент белем ала. Быел беренче курска 22 студент алына.