Татарстан Республикасы Премьер-министры Рөстәм Миңнеханов: “Горбунов исемендәге Казан авиация җитештерү берләшмәсе” “Берләшкән авиатөзелеш корпорациясе” составына керәчәк”

“Горбунов исемендәге Казан авиация җитештерү берләшмәсе” ААҖ “Берләшкән авиатөзелеш корпорациясе” ААҖ составына керәчәк. Бу турыда бүген Казанда узган матбугат конференциясендә Татарстан Республикасы Премьер-министры Рөстәм Миңнеханов хәбәр итте.
Матбугат конференциясе “Авиакосмик технологияләр һәм җиһазлар. Казан – 2008” дигән 4 нче халыкара күргәзмә кысаларында барды.
Татарстан Республикасы Хөкүмәте башлыгы сүзләренә караганда, авиация комплексының барлык предприятиеләрен алсак, бүгенге көндә “иң җитди хәл “Горбунов исемендәге Казан авиация җитештерү берләшмәсе”ндә килеп чыкты. Аны чишү өчен, федераль Хөкүмәт тә, Татарстан Республикасы да күп көч куярга тиеш. Бүген “Горбунов исемендәге Казан авиация җитештерү берләшмәсе”нең “Берләшкән авиатөзелеш корпорациясе” составына керәчәге турында сәяси карар кабул ителде”.
Бүген үк күргәзмә кысаларында Татарстан Республикасы Министрлар Кабинеты, “Горбунов исемендәге Казан авиация җитештерү берләшмәсе” һәм “Берләшкән авиатөзелеш корпорациясе” ААҖ арасында үзара бәйләнештә булу турындагы Килешүгә кул куелачак.
Бу документны Татарстан Премьер-министры Рөстәм Миңнеханов “предприятиегә башкалар белән бергә атларга мөмкинлек бирәчәк хәлиткеч килешү” дип атады.
Журналистларга “Берләшкән авиатөзелеш корпорациясе” президенты Алексей Федоров хәбәр итүенә караганда, “килешү гади декларация генә булып калмыйча, кабул ителәчәк чаралар һәм конкрет гамәлләр планы булып хезмәт итә”. Аерым алганда, “Берләшкән авиатөзелеш корпорациясе” предприятиенең финанс хәлен яхшырту буенча үз өстенә җитди йөкләмәләр ала. Алексей Федоров фикеренчә, нәкъ менә “Горбунов исемендәге Казан авиация җитештерү берләшмәсе”нең финанс хәлен яхшырту бүгенге көндә “иң мөһим һәм кискен мәсьәлә” булып тора. Финанс хәлен яхшыртудан башка, техник яктан яңадан коралландыру, кадрлар җыю һәм предприятиенең потенциалын арттыру, яңа эшләнмәләрне эшләтә башлау буенча калган планнарның мәгънәсез булып тоелуында шикләнми “Берләшкән авиатөзелеш корпорациясе” башлыгы.
“Горбунов исемендәге Казан авиация җитештерү берләшмәсе” хәзергә “Берләшкән авиатөзелеш корпорациясе”нә рәсми рәвештә кермәсә дә, без моның вакытлыча хәл икәнлеген аңлыйбыз”, - диде Алексей Федоров.
Ул шулай ук Татарстан Республикасының үз өстенә шактый җитди йөкләмәләр алуын, һәм аның ярдәменнән башка нидер эшләве авыр булачагын билгеләп узды. Татарстан Республикасы эшчәнлегенә караган юнәлешләр арасында Федоров әфәнде авиация предприятиесен яңадан төзү буенча ярдәм күрсәтү, профильле булмаган активларны чыгару юлы белән инвестиция потенциалын арттыру, кадрлар потенциалын көчәйтү, “Горбунов исемендәге Казан авиация җитештерү берләшмәсе” белгечләрен торак белән тәэмин итүне (социаль ипотека республика программасы кысаларында) атады.
“Без кул куячак килешү “Горбунов исемендәге Казан авиация җитештерү берләшмәсе”н яңадан торгызу өчен реаль база булыр дип ышанам”, - диде Алексей Федоров.
Моннан тыш, Алексей Федоров бу ел ахырына кадәр “Горбунов исемендәге Казан авиация җитештерү берләшмәсе” акцияләренең эмиссиясен теркәү һәм аларны “Берләшкән авиатөзелеш корпорациясе”нә тапшыру планлаштырылуын хәбәр итте. Эмиссия 2009 елның апреленә ябылачак. “Шулай итеп, бу вакыт эчендә “Горбунов исемендәге Казан авиация җитештерү берләшмәсе” акцияләре “Берләшкән авиатөзелеш корпорациясе”нең устав капиталына кертеп бетерелергә тиеш була”, - дип билгеләп үтте ул. Аның сүзләренә караганда, “Горбунов исемендәге Казан авиация җитештерү берләшмәсе”н финанслау 10 млрд. сум чамасы тәшкил итәчәк. Финанслау төрле чыганаклардан, шул исәптән “Берләшкән авиатөзелеш корпорациясе”нең бүлендек компанияләре счетыннан да алып барылачак.
“Финанслау берничә юнәлеш буенча барачак, һәм, барыннан да элек, безгә “Горбунов исемендәге Казан авиация җитештерү берләшмәсе”нең берничә млрд. сумга җыелган бурычын түләү мәсьәләсен хәл итәргә кирәк, - диде Алексей Федоров. – Без предприятиенең финанс хәлен яхшырту буенча план әзерләдек, шул исәптән , финанс ярдәм сорап, Рәсәй Хөкүмәтенә мөрәҗәгать иттек”.
Предприятиенең әйләнештәге акчаларын тулыландырырга да кирәк булачак, дип саный “Берләшкән авиатөзелеш корпорациясе” президенты, чөнки бүгенге көндә алар юк диярлек.
Казанда узган матбугат конференциясендә Алексей Федоров журналистларга болай диде: “Гомумән алганда, без 2010 ел ахырына кадәр Казан авиация җитештерү берләшмәсенә төрле чыганаклардан якынча 10 млрд. сум кертергә планлаштырабыз”.