Татарстан Хөкүмәте һәм Берләшкән авиатөзелеш корпорациясе арасында үзара бәйләнештә булу турындагы Килешү заказ бирүчеләр өчен якынча 30 Ту-214 самолеты эшләп чыгарырга мөмкинлек бирәчәк

Бүген Казанда “Заманча технологияләр – илебез авиация төзелешен яңадан торгызуның төп буыны” фәнни-гамәли конференциясен үткәрү кысаларында Татарстан Республикасы Министрлар Кабинеты, “Берләшкән авиатөзелеш корпорациясе” ААҖ һәм Горбунов исемендәге Казан авиация җитештерү берләшмәсе арасында үзара бәйләнештә булу турындагы килешүгә кул куелды.
Документка Татарстан Премьер-министры Рөстәм Миңнеханов һәм “Берләшкән авиатөзелеш корпорациясе” ААҖ президенты Алексей Федоров кул куйды.
Горбунов исемендәге Казан авиация җитештерү берләшмәсенең агымдагы эшчәнлеген киңәйтү, төзелгән контрактларны үтәү, предприятиенең бизнес-процессларын, мәгълүмати инфраструктурасын техник яктан яңадан коралландыру һәм үзгәртеп төзүгә инвестицияләр кертү өчен өстәмә финанслауны җәлеп итү буенча чаралар оештыру әлеге килешүнең темасы булып тора.
“Заманча технологияләр – илебез авиация төзелешен яңадан торгызуның төп буыны” фәнни-гамәли конференциясенең пленар утырышындагы докладында “Берләшкән авиатөзелеш корпорациясе” президенты Алексей Федоров хәбәр иткәнчә, “Берләшкән авиатөзелеш корпорациясе” һәм Горбунов исемендәге Казан авиация җитештерү берләшмәсенең уртак үсеш планы предприятие эшчәнлегенең күләмен үстерергә, 2008-2011 еллар дәвамында, керем күләме үсешен 5-7 тапкыр арттырып, дәүләти һәм коммерцияле заказ бирүчеләр өчен якынча 30 Ту-214 самолеты чыгарырга, шулай ук 2011 елга Ту-334 җитештерүне башлап җибәрергә мөмкинлек бирәчәк.