Универсиада өйрәнүләре вакытында Казанда 34 штаттан тыш хәлләр булган

2013 елның 8 июнендә Универсиада өйрәнүләре вакытында 34 штаттан тыш хәлләр була. Шуларның 18 алдан планлаштырылган. Бу хакта Татарстан Республикасы Министрлар Кабинетында узган брифингта Татарстан яшьләр эшләре, спорт һәм туризм министры Рафис Борһанов хәбәр итте.

“Өйрәнүләргә кадәр кайберәүләр бу репетицияләрнең әһәмиятлелегенә шикләнеп караса, 8 нче июнь көнне булган өйрәнүләрдән соң, барыбыз да Татарстан Президенты тарафыннан дөрес карар кабул ителүенә инандык. Бу шулай ук тәҗрибә туплау, чыныгу өчен дә зарур”, - дип ассызыклады Рафис Борһанов.

Министр әйтүенчә, өйрәнүләрдә барлыгы 812 кеше катнашкан. Нәфис гимнастика, баскетбол, регби-7, көрәш, волейбол, су тубы, фехтование, йөзү, суга сикерү, байдаркаларда ишү һәм каноэ кебек спорт төрләре буенча ярышларны үткәрү өчен 24 объект файдаланылган. Казанның 29 балалар-үсмерләр спорт мәктәбеннән, олимпия резервының спорт училищеларыннан 681 спортчы җәлеп ителгән. Башкарма дирекциянең даими һәм вакытлыча эшләүче 670 хезмәткәре дә шимбә көнне вакытын өйрәнүләргә багышлаган. Репетиция барышында волонтерларны да сынау күздә тотылганлыктан, 65 волонтер-атташе эшкә чакырылган.

Штаттан тыш хәлләргә килгәндә, Рафис Борһанов сүзләренчә, алар барысы да хәл ителгән. Кайдадыр ут сүнү, су белән тәэминат өзелү кебек очракларда эш рәвеше сыналды. Көч структуралары янгын чыгу, төтен пәйда булу, кешеләрне эвакуацияләү кебек эшләр белән мәшгуль булды”, - диде Рафис Борһанов.

Көтелмәгән хәлләр дә килеп чыккан. Рафис Борһанов үзе ике шундый хәлнең шаһиты булган. Колоннада автобусның тәгәрмәч көпчәге тишелгән. Иртәнге тикшерү барышында автобус йөртүчеләрнең берсенең үзе белән транспорт йөртү таныклыгы булмаган.

“Казан 2013” башкарма дирекциясе” генераль директор урынбасары Ольга Павлова өйрәнүләр барышында тукландыру системасы сыналуын, 8 нче июнь көнне вип-персоналар һәм судьялар өчен чәй өстәлләре корылуы һәм спортчылар өчен кабымлыклар пакеты әзерләнүе турында хәбәр итте. “Допингка каршы системаны да тулысынча тикшердек, диде ул.

“Тулаем алганда, өйрәнүләрнең беренче көне оешкан төстә узды. Сораштыру барышында команда тренерлары спорт комплекслары эшен мөмкин булган 5 баллдан 4,7 балл күләмендә бәяләде. Бәлки, бу берникадәр аванстыр, шуңа күрә бу бәяләмәне Универсиадада тулысынча акларга кирәк булачак. Хәзер без 15 нче июнь өйрәнүләренә әзерләнәбез”, - дип билгеләп үтте Рафис Борһанов.

15 нче июнь көнне 10 нчы июльнең уен программасына репетиция ясалачак. Бу иң катлаулы тыгыз көннәрнең берсе санала. 21 нче июнь көнне “Казан” аэропорты, спортчыларны Универсиада авылына урнаштыру, авылның төп ресторанында тукландыру тикшереләчәк. 22 нче июнь көнне Универсиада ачылышы тантанасы өйрәнеләчәк. Спорт объектларында ярышлар программасы, ресторанда 4 мәртәбә ашату, авылдан “Казан-Арена” стадионына илтү, спортчылар парады, һәм кире алып кайту өйрәнеләчәк.