Татарстанда 14 июньгә 1 млн. 92 мең кв.м. торак сафка бастырылган, яисә еллык йөкләмәнең 45,6%

Бүгенгә Татарстан Республикасында 1 млн.92 мең кв.м торак, яисә еллык йөкләмәнең 45,6 проценты сафка бастырылган. Апас, Лаеш, Питрәч һәм Тукай муниципаль районнары еллык планны үтәгәннәр. Бу хакта бүген ТР Хөкүмәте Йортында ТР Премьер-министры Илдар Халиков катнашында үткән республика киңәшмәсендә ТР төзелеш, архитектура һәм торак-коммуналь хуҗалыгы министры Ирек Фәйзуллин хәбәр итте.

5 муниципаль районда - Аксубай, Югары Ослан, Кама Тамагы, Нурат һәм Сарман - еллык биремнең 80 проценттан артыгы үтәлгән. Ә 29 муниципаль берәмлектә торакны сафка бастыру планы әлегә 40 процентка гына башкарылган.

Социаль ипотека буенча планның да яртысы диярлек үтәлгән. Программаның 133 йортыннан 191 мең кв.метр мәйданлы 3 мең 388 фатирлы 59 йорт сафка бастырылган. Бүгенгә ТР Дәүләт торак фонды программасы буенча май планы нигезендә 105 фатирлы ике йорт әле һаман төзелеп бетмәгән. Ирек Фәйзуллин хәбәр иткәнчә, әлеге йортларда 49 Бөек Ватан сугышы ветераны фатир алачак. Моңа бәйле рәвештә, ул атна дәвамында әлеге йортларны сафка бастыруларын сорады.

Сугыш ветераннарының яшәү шартларын яхшыртуга килгәндә, республикада 458 ветеран өчен 105 йорт төзелеше дәвам итә. 42 объект - югары әзерлек дәрәҗәсендә, 2013 нче елның июне ахырына республикада 102 ветеран өчен 8 торак йортны сафа бастыру планлаштырыла.

ТР Төзелеш, архитектура һәм торак-коммуналь хуҗалыгы министры Ирек Фәйзуллин әйтүенчә, республика августта федераль бюджеттан 300 ветеран өчен акчалар алырга исәпли.

Моннан тыш, "Авыл клублары" программасы кысаларында эш барлык 46 объектта оештырылган. ТРның Арча районындагысы инде тапшыруга әзер. 9 объектта эшнең начар оештырылуы күзәтелә.

Ирек Фәйзуллин сүзләренчә, күпфункцияле үзәкләр урнашачак 27 объектның алтысында капиталь ремонт башланган. Бу максатларга 310 млн. сум бүлеп бирелгән.