Татарстанда санитар-экология ике айлыгы кысаларында 1595 рөхсәтсез чүп урыны ачыкланган

Татарстан Республикасында шәһәр һәм район территорияләрен чистарту буенча санитар-экология ике айлыгына бүген республика киңәшмәсендә ТР экология һәм табигать ресурслары министры Артем Сидоров нәтиҗә ясады.

Киңәшмә гадәттәгечә ТР Хөкүмәт Йортында Татарстанның барлык муниципаль районнары белән видеоконференция режимында узды, аны Татарстан Республикасының Премьер-министры Илдар Халиков алып барды.

Искә төшерәбез, быел бу ике айлык 15 апрельдән 15 июньгә кадәр булды.
Артем Сидоров сүзләренчә, бу вакыт эчендә сәнәгать һәм туклану калдыклары белән эш итүгә бәйле 10792 тәртип бозу теркәлгән.

Ачыкланган тәртип бозулар нәтиҗәләре буенча республиканың 179 предприятиесе һәм оешмасы, 1 меңнән артык вазыйфаи зат җаваплылыкка тартылган. 18,5 млн. сумлык штраф салынган. Тәртип бозган оешмаларга карата 60тан артык материал прокуратурага җибәрелгән. Һәр бишенче административ материал муниципалитетлар тарафыннан төзелгән.

Республика буенча ике айлык дәвамында 1595 рөхсәтсез чүп урыны ачыкланган, шуларның 1419ы бетерелгән.