Минтимер Шәймиев Казакъстан Республикасының Семей шәһәре белән танышты

ТР Дәүләт Киңәшчесе Минтимер Шәймиев җитәкчелегендәге Татарстан Республикасы делегациясе, Көнчыгыш-Казакъстан өлкәсе хакиме Бирдебәк Сапарбаев һәм Семей шәһәре хакиме Айбәк Кәримов озатуында, тумышы белән шушы өлкәдән булган казакъ шагыйре, язучысы, җәмәгать эшлеклесе, композитор, казакъ язма әдәбиятына нигез салучы Абай Конанбаевның тарихи-мәдәни һәм әдәби-мемориаль музей-тыюлыгында булды.
Аннан соң Минтимер Шәймиев Абай һәйкәленә чәчәкләр салды.

Татарстан кунаклары аннары 1985 елда нигез салынган Невзоровлар гаиләсе исемендәге Көнчыгыш-Казакъстан өлкәсе сынлы сәнгать музеен карадылар.

Монда ук Алматада яшәүче, Татарстанның халык рәссамы, Татарстанның Г.Тукай исемендәге Дәүләт бүләге лауреаты Камил Муллашевның күргәзмәсен ачу тантанасы булды. Күргәзмәне автор үзе – Камил Муллашев тәкъдим итте.

Татарстан делегациясе шулай ук Өлкә махсуслаштырылган балет мәктәбендә булды. Бу мәктәптә тәрбияләнүчеләр – бик күп республика һәм халыкара конкурсларда җиңүчеләр, кунакларга үзләренең осталыкларын күрсәттеләр һәм аларга истәлек медальләре тапшырдылар.

Татарстанлылар тагын Казакъстанда бердәнбер булган Татар сәнгать мәктәбе белән таныштылар. Бу мәктәпнең бинасы 1898 елда төзелгән була һәм ул үз вакытында Минтимер Шәймиевнең булышлыгы белән сакланып кала.

Минтимер Шәймиев һәм Бирдебәк Сапарбаев быел нигез салынган “Казан агачы” паркында агачлар утырттылар. Парк территориясен яшелләндерү өчен уртак проект нигезендә, ТР Урман хуҗалыгы министрлыгы тарафыннан Семей шәһәренә кирәкле утырту материллары – каен, чыршы, нарат һәм башка агач-куаклыклар, җиләк-җимеш үсемлекләре җибәрелә, аларның күбесе инде утыртылган.

Аннары кунакларны шәһәрнең иң популяр урыннарының берсе - “Полковничий” утравына чакырдылар.
Татар халык бәйрәме – Сабан туе да шушы утрауда узды.