Минтимер Шәймиев: “Без дус идек, дусларбыз һәм дус булырбыз”

Кичә Казакъстанның Семей шәһәрендә татар милли бәйрәме-Сабан туе узды. Бәйрәмдә Татарстан Республикасының Дәүләт Киңәшчесе Минтимер Шәймиев һәм Көнчыгыш-Казакъстан өлкәсе хакиме Бирдебәк Сапарбаев катнашты.

Аларны Семей шәһәре хакиме Айбәк Кәримов, Мәдәният, фән, мәгариф һәм милли мәсьәләләр буенча ТР Дәүләт Советы Комитеты рәисе Разил Вәлиев, “Бөтендөнья татар конгрессы” башкарма комитеты рәисе Ринат Закиров, ТРның Нурлат районы башлыгы Наил Шарапов, ТР мәдәният министры урынбасары Гүзәл Нигъмәтуллина, Усть-Каменогорскта РФ генераль консулы Сергей Анненков, Казакъстанда ТРның Тулы вәкаләтле вәкиле урынбасары Рафаил Аблаков, Казанда Казакъстанның генераль консулы Әсхәт Нускабай озатып йөрделәр.

“Минтимер Шәрипович, Татарстан Президенты булганда, Татарстан һәм Казакъстан арасындагы элемтәләрне ныгыту өчен күп эшләде.Бүген аның, безнең Сабан туенда катнашуы белән без бик горурланабыз”, дип белдерде Бирдебәк Сапарбаев. Барлык Көнчыгыш-Казакъстан халкы исеменнән Минтимер Шәймиевкә, Семей халкына булган игътибары өчен рәхмәт белдерде.

Аннан соң кунакларны һәм бәйрәмдә катнашучыларны, Татарстан Президенты һәм халкы исеменнән, Татарстанның Беренче Президенты Минтимер Шәймиев сәламләде.
Минтимер Шәймиев шулай ук, Сабан туе-татар милли бәйрәме, ул ел саен киңрәк җәелә бара, быел Татарстан ярдәме белән дөньяның 226 урынында Сабан туе уздырыла, дип белдерде.
“Бүген халыклар арасында якынаю өчен, үзара аңлашып, тыныч яшәү өчен барлык мөмкинлекләр дә бар. Без сезнең белән дус идек, дусларбыз һәм дус булырбыз”,-дип йомгаклады ул сүзен.

Быел Семей шәһәрендәге Сабан туе Татарстанның Нурлат районы катнашында уза. Алар Сабан туе мәйданында үз мәйданчыкларын төзеп, Нурлат районында яшәгән татар, рус, чуаш һәм башка милләтләрнең гореф-гадәтләрен, йолаларын күрсәттеләр.

Гадәт буенча, бәйрәмнең иң күңелле өлеше - татарча көрәш булды. Көрәштә Павлодар өлкәсеннән Дархан Жоламанов иң көчле булып чыкты. Җиңүчегә Татарстан Президенты Рөстәм Миңнеханов бүләге – автомобиль ачкычларын ТР Дәүләт Киңәшчесе Минтимер Шәймиев тапшырды.