“Томсон Рейтерс” (Thomson Reuters) компаниясе Татарстан Республикасы чимал һәм энергетика компанияләре өчен үз мөмкинлекләрен һәм хезмәт күрсәтүләрен тәкъдир итә
“Томсон Рейтерс” (Thomson Reuters) компаниясе – халыкара мәгълүмат агентлыгы һәм мәгълүмат хезмәтләре күрсәтүче - Татарстан Республикасы чимал һәм энергетика компанияләре өчен үз мөмкинлекләрен һәм хезмәт күрсәтүләрен тәкъдир итте. “Томсон Рейтерс” тәкъдир итүе “Татнефтехиминвест-холдинг” ААҖ Директорлар советының чираттагы утырышы кысаларында узды.
Бу хакта Татарстан Республикасы Президенты Р.Н. Миңнехановның “Томсон Рейтерс” компаниясе җитәкчелеге – компаниянең финанс һәм бизнес иминлеге өлкәсендә президенты Дэвид Крейг һәм Урта Азия, Африка, Россия һәм БДБ илләре буенча идарәче директоры Басил Мофтах белән очрашуында сөйләшеп килешенде.
Очрашу Петербург халыкара икътисадый форумы ( “Ленэкспо” комплексы, Санкт-Петербург) кысаларында узды.
Рөстәм Миңнеханов бүгенге очрашу барышында билгеләп үткәнчә, Татарстан Республикасының “Томсон Рейтерс” компаниясе белән хезмәттәшлеге кайбер проектлар, шул исәптән “Смарт Сити Казан” проекты буенча да уңышлы бара. Татарстан Президенты шулай ук компания җитәкчелегенә Annual Investment Meeting (AIM) инвестицион форум кысаларында “Томсон Рейтерс”ның Дубайдагы (Берләшкән Гарәп Әмирлеге) офисында булу мөмкинлеге өчен рәхмәт белдерде.
Исегезгә төшерәбез, “Томсон Рейтерс” компаниясе – эре халыкара мәгълүмат агентлыгы һәм мәгълүмат сервислары белән шөгыльләнүче, аның 150 еллык тарихы бар.
“Без клиент компанияләребез эшчәнлекнең төрле өлкәләрендә, шул исәптән мәгарифтә, икътисадта, финанс базарларында уңышларга ирешсен өчен ярдәм күрсәтәбез, - дип белдерде компания вәкиле. – Без дөрес мәгълүмат кына бирәбез, һәм клиентлар ышанычы безнең өчен бик мөһим”.
“Томсон Рейтерс” һәм Татарстан Республикасы сәнәгать предприятиеләре арасындагы мәгълүмати хезмәттәшлек аларны халыкара базарларга чыгарырга, потенциаль инвесторларны җәлеп итәргә ярдәм итәр дип көтелә.
Очрашу азагында Thomson Reuters белән Татарстан Республикасы Инвестицион үсеш агентлыгы арасында хезмәттәшлекнең агымдагы торышы турындагы беркетмәгә имза салынды. Документка Татарстан Республикасы Инвестицион үсеш агентлыгы җитәкчесе Линар Якупов һәм “Томсон Рейтерс” компаниясенең Урта Азия, Африка, Россия һәм БДБ илләре буенча идарәче директоры Басил Мофтах имза салды.