Рөстәм Миңнеханов: Татарстан өчен автомобиль төзелешендә, медицинада, энергетикада, нефть химиясендә Германия компанияләре белән кооперация аеруча мөһим
Бүген Татарстан Республикасы Президенты Р.Н. Миңнеханов Германия Федератив Республикасының (ФРГ) Төньяк Рейн - Вестфалия федераль җире делегациясе әгъзалары белән очрашты.
Очрашу Петербург халыкара икътисадый форумы кысаларында (“Ленэкспо” комплексы, Санкт-Петербург) Төньяк Рейн - Вестфалия федераль җире (ФРГ) Икътисад министрлыгының дәүләт секретаре Гюнтер Хорцетцки җитәкчелегендәге делегация әгъзаларын сәламләп, Рөстәм Миңнеханов бүген Германиянең бу – иң алга киткән, кеше һәм сәнәгать ресурслары тупланган регионнарыннан берсе, дип билгеләп үтте.
Татарстан Республикасының Германия предприятиеләре белән хезмәттәшлеге уңышлы гамәлгә ашырыла, дип хәбәр итте. Мондый хезмәттәшлекнең мисалы – “КАМАЗ” ААҖ, аның партнерлары һәм поставщиклары күп кенә Германия предприятиеләре, шул исәптән “Даймлер“, “Кнорр Бремзе “компанияләре һәм башкалар.
Безне Германиянең башка компанияләренең дә Россия базарына керүе кызыксындыра, дип белдерде Рөстәм Миңнеханов, Татарстан Республикасында чит илләр компанияләренең эшчәнлеген башкару өчен “Алабуга “ махсус икътисадый зонасы, “Иннополис “ инновацион проекты һәм башка мәйданчыклар бар. Татарстан Республикасы Президенты сүзләренчә, республика өчен мәгълүмат технологияләре, автомобиль төзелеше һәм станоклар төзелеше, медицина, энергетика, нефть химиясе, авиация, шулай ук фән һәм мәгариф өлкәсендәге Германия компанияләре белән кооперация аеруча мөһим.
Аерым алганда, Рөстәм Миңнеханов билгеләп үткәнчә, күп кенә Татарстан югары уку йортлары Германия университетлары белән турыдан-туры элемтәдә тора. Германия югары уку йортлары базасында Татарстаннан килгән студентлар укый, белгечләрнең квалификациясе күтәрелә.
Казанда Герман-Россия яңа технологияләр институты булдыру бездз зур өмет уята, дип хәбәр итте Рөстәм Миңнеханов. Бу югары уку йорты А.Н.Туполев исемендәге КНИТУ базасында Ильменау (Тюрингия) Техник университеты катнашында һәм Академик алмашулар буенча Германия хезмәте (DAAD) ярдәмендә ачыла.
Германия белгечләрен җәлеп итеп һәм җайланмаларны файдаланып, Татарстан Республикасы медицина комплексларын модернизацияли, дип ассызыклады Рөстәм Миңнеханов, без хезмәттәшлекнең яңа мөмкинлекләре буенча фикер алышырга әзер.
Үз чиратында, Төньяк Рейн - Вестфалия федераль җире делегациясе әгъзалары очрашу мөмкинлеге һәм хезмәттәшлекнең перспектив юнәлешләре өчен рәхмәт белдерделәр. Германия предприятиеләренең Татарстан Республикасы белән хезмәттәшлек итәргә зур потенциалы бар, диде Гюнтер Хорцетцки.
Очрашу барышында яклар Татарстан Республикасы белән Төньяк Рейн - Вестфалия федераль җире бизнес вәкилләре мәнфәгатьләрен кайгырта торган эш төркеме төзү турында сөйләштеләр.
Рөстәм Миңнехановка шулай ук хәбәр ителгәнчә, 2013 елның сентябрь азагында Төньяк Рейн - Вестфалия федераль җире бизнес вәкилләренең Татарстан Республикасына визиты планлаштырыла. Алар өчен республика сәнәгать һәм инвестиция потенциалы тәкъдир ителәчәк.