Сингапур Премьер-министры урынбасары: “Татарстан Россия төбәкләре арасында бик аерылып тора”

Бүген Сингапур Премьер-министры урынбасары, финанслар министры Тарман Шанмугаратнам җитәкчелегендәге рәсми делегация ТР га визиты кысаларында Казан IT-паркында булды.Анда Татарстан-Сингапур эшлекле форумы узды. Форумда ТР Премьер-министры Илдар Халиков, республика Премьер-министрының беренче урынбасары Равил Моратов, ТР вице-премьеры – мәгълүматлаштыру һәм элемтә министры Роман Шәйхетдинов, Татарстан Инвестицион үсеш агентлыгы җитәкчесе Линар Якупов катнашты.

Сингапурның рәсми делегациясендә хөкүмәт җитәкчеләреннән тыш эшлекле даирә, икътисад һәм сәнәгать өлкәләре, Сингапурның һәм халыкара зур компанияләр вәкилләре бар иде.
Илдар Халиков форумда катнашучыларга мөрәҗәгать итеп, Сингапур ТР өчен үрнәк булып тора, дип белдерде. Аның сүзләренә караганда, Татарстан барлык урта һәм югары звено дәүләт хезмәткәрләре Сингапурда стажировка узган Россиянең бердәнбер төбәге.

“11 уку курслары узды, аларда ТР хакимият органнарының 203 вәкиле катнашты. Татарстан Президенты ел саен Россия-Сингапур эшлекле форумында катнаша”, - дип билгеләп үтте И.Халиков һәм Татарстан вәкилләре Сингапур тәҗрибәсен өйрәнүен, бүгенге көндә күп кенә проектларның республикада гамәлгә кертелгәнен ассызыклады. Аерым алганда ул, Татарстанда иң зур проектларның берсе -“Иннополис”ның мастер-планы Сингапур компаниясе тарафыннан эшләнгәнен искә алды. Аннары Илдар Халиков кунакларны ТР ның икътисади потенциалы һәм аның үсеш перспективалары белән таныштырды.

Сингапур Премьер-министры урынбасары, финанслар министры Тарман Шанмугаратнам үз чиратында, Сингапур Россиянең икътисади үсеш алган төбәге Татарстан белән хезмәттәшлек итүгә зур кызыксыну белдерә, диде.

“ Мин Татарстанның Россия төбәкләре арасында аерылып торуын аңладым. Татарстан өстенлекләренең берсе-көчле җитәкчелек, шулай ук белем дәрәҗәсе югары булу. Биредә IТ өлкәсе инициативаларына юнәлдерелгән транспорт инфраструктурасы һәм сәнәгать үсеш алган. Казан эшмәкәрлек алып бару өчен Россиянең иң яхшы шәһәрләре исәбенә керә”, - дип билгеләп үтте Тарман Шанмугаратнам.
Сингапур делегациясе башлыгы, 2009 елда Татарстан белән Сингапур арасында берничә меморандум имзалануын искә төшерде. Алар мәгариф, “Электрон хөкүмәт”, махсус икътисадый зона һәм дәүләт идарәсе үсеше өлкәсендәге хезмәттәшлеккә карый, тагын ике меморандум имза куюга әзер.

Эшлекле форум кысаларында Сингапур делегациясе әгзалары өчен ТР ның иң зур “Иннополис” һәм “Смарт Сити Казань” инфраструктура проектларын тәкъдир итү оештырылды.