Фаяз Шабаев: Бүген республика территориясендә тикшерүләр нәтиҗәсендә тартып алынган наркотик матдәләрнең 47-48% синтетик наркотиклар

Татарстан Республикасы территориясендә тартып алынган наркотик матдәләрнең якынча яртысы синтетик наркотиклар. Бу хакта бүген Татарстан Хөкүмәте Йортында узган брифингта РФ Наркотиклар әйләнешенә күзәтчелек федераль хезмәтенең ТР буенча идарәсе башлыгы Фаяз Шабаев хәбәр итте.
Брифинг наркотиклар куллану һәм аларның ТР территориясендә законсыз әйләнеше белән көрәш мәсьәләләренә багышланган иде. Бу чара гадәттәгечә республиканың барлык муниципаль районнары белән видеоконференция-элемтә режимында узды.

Фаяз Шабаев искәртүенчә, брифинг 26 июнь – Бөтендөнья наркомания һәм наркобизнес белән көрәш көненә туры китерелгән. Аның сүзләренчә, рәсми мәгълүматлар буенча Россиядә 8,5 мең, Татарстан Республикасында якынча 17 мең кеше наркотиклар куллана.

Нигездә Кытай һәм Европадан кертелүче яңа синтетик наркотикларның таралуы наркотикларга кагылышлы хәлгә җитди йогынты ясый, диде Фаяз Шабаев. Бүгенге көнгә Татарстан Республикасы территориясендә тикшерүләр нәтиҗәсендә тартып алынган наркотикларның 47-48% синтетик наркотиклар.

“Соңгы елларда наркотиклар базарында героин кулланудан яңа төр наркотиклар куллануга күчеш бара,- дип сөйләде Фаяз Шабаев. 2012 елда хокук саклау органнары тарафыннан яңа наркотикларның 20 төре тартып алынган, 2013 елның беренче ярты еллыгында тагын яңа наркотикларның 9 төре теркәлгән”.

Наркотиклар куллануга һәм аларны таратуга каршы эш җәелдерелгән, 2013 елның язында электрон система аша хәбәрләшеп, наркотиклар таратуда катнашкан төркемнең эшчәнлегенә чик куелды,-дип белдерде Фаяз Шабаев.