Татарстан Республикасы авыл хуҗалыгы һәм азык-төлек министры Марат Әхмәтов: “Республика районнарында уртача уңыш гектарыннан 37,1 центнер тәшкил итә”

Соңгы мәгълүматлар буенча, Татарстан Республикасында бөртеклеләрнең тулай җыемы 5 млн. 326 мең тонна тәшкил иткән. Бу турыда бүген Татарстан Республикасы Министрлар Кабинетында узган киңәшмәдә Татарстан Республикасы авыл хуҗалыгы һәм азык-төлек министры Марат Әхмәтов хәбәр итте.
Киңәшмә Татарстан Республикасы Премьер-министры Рөстәм Миңнеханов катнашында видеоконференцэлемтә режимында үтте.
Республика районнарында уртача уңыш гектарыннан 37,1 центнер тәшкил итә.
Татарстан Республикасы Авыл хуҗалыгы министрлыгының оператив мәгълүматларына караганда, республикада 250 мең гектарга якын (рапсны да кертеп) ашлык җыеп аласы бар. Шул ук вакытта зур мәйданнарда җыеп аласы ашлык калган районнар да бар һәм һәр тәүлек саен уңыш гектарыннан якынча 1 центнерга кими бара (Азнакай, Арча, Лениногорск, Мамадыш, Әтнә, Балтач, Кайбыч, Чүпрәле, Югары Ослан, Кама Тамагы, Тәтеш районнары).
Августта республикада 12 көн рәттән тәүлеклек суктырып алынган игеннең күләме 200 мең тонна, ә бер көндә Татарстан өчен рекордлы булган иген суктыру – 258 мең тонна булды.
Уңдырышлылык лидерлары булып, Норлат һәм Актаныш районнары (уртача уңдырышлылык 51,5 һәм 48,5 ц/га тәшкил итә) тора. Республиканың уңдырышлылык 40 ц/га дан артык булган тагын 10 районы бар.
“Быел без 6 млн. тоннадан да ким булмаган бөртеклеләр уңышы җыеп алырга уйлыйбыз, - диде Марат Әхмәтов. – Ләкин барысы да безнең оешканлыктан тора”.
“Республика кырларында 2 меңнән артык комбайн амортизация чикләреннән тыш эшли, - дип билгеләп үтте Татарстан Республикасы авыл хуҗалыгы һәм азык-төлек министры Марат Әхмәтов, - шуңа күрә дә Татарстан Республикасы Хөкүмәте тарафыннан 300 яңа чит ил комбайны сатып алу турында карар кабул ителде. Алар көзен инде сатып алыначак”.
Республика кырларында барысы 4700 комбайн эшли.
“Республикада якынча 2 млн. гектар мәйданда җир эшкәртү күздә тотыла”, дип хәбәр итте Марат Әхмәтов. Аның сүзләренә караганда, бүгенгә 700 мең гектар яки авыл хуҗалыгы мәйданнарының 35% ы эшкәртелгән.