Татарстан Премьер-министры Рөстәм Миңнеханов киләсе елда төзи башлау күздә тотыла торган стратегик объектлар турында сөйләде

2009 елда Татарстан Республикасы мөһим стратегик объектлар төзергә уйлый. Төзелешкә дигән акчаның бер өлешен өстәмә керемнәрдән бүлеп бирү күздә тотыла. Бу турыда бүген Татарстан Республикасы Министрлар Кабинеты утырышында Татарстан Хөкүмәте башлыгы Рөстәм Миңнеханов хәбәр итте.
Шуны да искәртик: утырыш 2009 елга һәм 2011 елга кадәрге вакытка Татарстан Республикасының социаль-икътисади үсеше һәм 2009 елга Татарстан Республикасы бюджетының алдан фаразлануы турында фикер алышуга багышланган иде. Әлеге чара республиканың барлык муниципаль районнары катнашында видеоконференцэлемтә режимында узды.
“Әйтик, республикада киләсе елда Яр Чаллыда - медицина үзәге, Казанда ашыгыч медицина ярдәме хастаханәсе төзелешен башлап җибәрү күздә тотыла”, - диде Татарстан Республикасы Премьер-министры.
Моннан тыш, Рөстәм Миңнеханов сүзләренә караганда, хосусый-дәүләти партнерлык шартларында Милли китапханә төзү (муниципалитет һәм “Ак Барс” банкы ярдәме белән) эшләре башланып китәчәк.
Күптән планга кертелгән Балалар курчак театры төзелешенә килгәндә, Татарстанның Министрлар Кабинеты башлыгы хәбәр иткәнчә, бу проектка дигән акча шулай ук исәпләп куелган инде.
“Бу стратегик мөһим объектлар буенча бөтен якларның да бер фикергә килүе таләп ителә”, - диде Рөстәм Миңнеханов.
Инде 2009 елдан ук өстәмә керемнәрдән акчаның бер өлешен Универсиада-2013 кә дигән объектлар (спорт биналары, корылмалары, инфраструктура) төзелешенә җибәрү планлаштырыла.
“Без Казан метрополитены төзелешенә билгеләнгән бюджетны да яңадан карап чыктык”, - дип билгеләп узды бүгенге утырышта Татарстан Республикасы Премьер-министры. Аның сүзләренә караганда, метрополитен хакы 500 млн. сумнан 2 млрд. сумга чаклы үскән (2009 елда). Рөстәм Миңнеханов бер станцияне (“Җиңү проспекты”) инде 2008 ел ахырында ук тапшырырга кирәк дип саный.
“2009 елда агросәнәгать комплексын үстерүгә - 1,5 млрд. сумга кадәр, аерым алганда, чит илдә җитештерелгән заманча комбайннар сатып алуга 1 млрд. сум чамасы бүлеп бирү күздә тотыла. Ни кызганыч, илебездә җитештерелгән комбайннарны сатып алу быел безнең күңелебезне кайтарды”, - диде Татарстан Республикасы Министрлар Кабинеты утырышында Рөстәм Миңнеханов, ләкин чит илдә җитештерелгән комбайннарны сатып алуның кыйммәткәрәк төшүенә дә карамастан, бу урып-җыю кампаниясе барышында вакытны әрәм итмәскә ярдәм итә.
“Киләсе елда хезмәткә түләүнең тармак принципларына күчү дә (2009 елның 1 нче гыйнварыннан) шактый акча салуны таләп итәчәк”, - дип билгеләп узды Татарстан Республикасы Хөкүмәте башлыгы. Ул хәзерге вакытта хезмәткә түләүнең принципларын эшләү республиканың ике “пилот районында” баруын искәртте.