Казанда яңа никахлашу сарае ачылды

Бүген Татарстан башкаласында яңа никахлашу сарае -“Казан” гаилә үзәге - ачылды. Бу тантанада ТР Премьер-министры Илдар Халиков, Казан мэры Илсур Метшин катнашты.

“Казан” гаилә үзәге бинасы Казансу елгасының уң як ярында атаклы рәссам һәм скульптор Даши Намдаков проекты буенча республика бюджеты акчасына төзелгән.Бинаның гомуми мәйданы 6200 квадрат метр тәшкил итә, өч залдан тыш, кияү һәм кәләш бүлмәләре, котлаулар залы бар. Бүген монда беренче никахлашу тантаналары узды.

Һәр көн саен яңа никахлашу сараенда 100 гә кадәр никахлашу тантанасы уздырырга мөмкин. Бүген тантаналы төстә, иртәгә Казанда башланачак Бөтендөнья җәйге Универсиада хөрмәтенә,берьюлы 27 пар никахлашты.

Казан мэры Илсур Метшин яшьләрне бәйрәм белән котлады, аларга гаилә бәхете теләде. И. Метшин шулай ук шәһәргә ясалган бу бүләк өчен Татарстан җитәкчелегенә рәхмәт белдерде.

ТР Премьер-министры Илдар Халиков үзенең чыгышында, “Казан” гаилә үзәге республика башкаласы символларының берсенә әверелергә өлгерде, дип белдерде. “Ышанам, тиз арада ул күп сандагы фоторәсемнәрдә һәм шәһәр күренеше булган открыткаларда күренәчәк”,-диде Татарстан Хөкүмәте башлыгы.

Тантана барышында шулай ук 60 елдан артык бергә яшәгән гаиләләрне хөрмәтләү булды.

Мактаулы кунаклар яңа никахлашу сараеның символик кызыл тасмасын кистеләр, аннан соң яшь өйләнешүчеләр белән бинаның түбәсенә күтәрелделәр. Монда кияүләр һәм кәләшләр туй биюләрен башкардылар һәм истәлеккә фотога төштеләр.