Рөстәм Миңнеханов “Радио Спорт” тапшыруын эшләтеп җибәрде

Бүген Казанда “Радио Спорт” үзенең тапшыруын башлады. Тантаналы чарада Татарстан Президенты Рөстәм Миңнеханов катнашты.

“Радио Спорт” үзенең тапшыруларын 2006 елның июнендә башлый, 2012 елдан “Европа медиагруппасы” составына керә. Хәзерге вакытта “Радио Спорт” РФнең 7 шәһәрендә эшли: Мәскәү, Владимир, Карачаевск, Липецк, Ставрополь, Тамбов, Чиләбе.
Татарстан башкаласы 8 нче шәһәр, ә ешлыгы 91,9 FM. 2014 елга Сочи шәһәрендә узачак кышкы Олимпия уеннарына спорт радиотапшыруларының гомуммилли челтәре эшли башлаячак.

Бүген Г. Камал театры каршындагы бәйрәмдә эстрада йолдызлары Юлия Савичева һәм Дима Билан чыгыш ясады. Татарстан Президенты Рөстәм Миңнеханов бәйрәм кунакларын сәламләде.
“Иртәгә рәсми рәвештә Универсиада ачыла, шуңа өстәп бүген “Радио Спорт” үзенең эшен башлады. Безнең барлык спорт чаралары бу радио тапшыруларында яктыртылачак”,- дип белдерде Рөстәм Миңнеханов.

“Радио Спорт” ның Директорлар советы рәисе Михаил Федяев Татарстан Президентына спорт радиосы тапшыруларын ачып җибәрүгә ярдәме өчен рәхмәт белдерде. “Радио Универсиада ачылышы алдыннан эшли башласын өчен кулдан килгәннең барысын да эшләдек”, - диде ул.
Михаил Федяев шулай ук Иске Чүпрәле авылында хоккей тартмасын төзекләндерү өчен 500 мең сумлык сертификат тапшырды.

Дәрәҗәле кунаклар символик төймәгә басып, тантаналы рәвештә тапшыруның эшли башлавын белдерделәр. Шунда ук урнашкан күчмә студиядә Рөстәм Миңнеханов туры эфирда кыскача интервью бирде. “Без күп спорт объектлары, спорт мәктәпләре булдырдык, бу – безнең уңышларыбызның нигезе”,- диде ул. Рөстәм Миңнеханов Россия Президенты Владимир Путинга, студентлар уеннарын уздыруга Казанны сайлауда ярдәме өчен рәхмәт белдерде.