Казан астында поликарбонаттан табак җитештерү буенча Россиядә иң эреләрдән саналган завод ачылды

Бүген Татарстан Республикасында поликарбонаттан табак җитештерү буенча Россиядә иң эреләрдән саналган SafPlast Innovative заводы тантаналы рәвештә ачылды. Яңа производствоны ачу тантанасында Татарстан Премьер-министры Рөстәм Миңнеханов катнашты.
SafPlast Innovative заводы Казан астында урнашты, җир кишәрлегенең гомуми мәйданы 1, 4958 га тәшкил итә.
Заводның проект егәрлеге – ел саен 14 мең тонна продукция. Журналистларга предприятиенең генераль директоры Денис Макаров хәбәр иткәнчә, проект егәрлегенә 2009 елда ирешү планлаштырыла (монолитлы поликарбонат җитештерү буенча өченче линияне җибәргәннән соң).
Өч экструзион линия өчен җиһаз җитештерүче - Omipa компаниясе (Италия).
Әлегә SafPlast Innovative заводы елына 10 мең тонна продукция җитештерүне планлаштыра. Белгечләрнең бәяләүләре буенча, бу әлеге продукция Россиядәге базарның нәкъ 50 % ын алып торачак дигән сүз.
Татарстан Республикасы төзелеш, архитектура һәм торак-коммуналь хуҗалык министры урынбасары, “Татинвестгражданпроект” дәүләт унитар предприятиесе генераль директоры Ирек Фәйзуллин производствоны ачу тантанасында заводның бер елдан да ким вакыт эчендә төзелеп бетүен әйтеп китте. Аның сүзләренә караганда, продукциянең бу төренә бүгенге көндә республика территориясендә дә, тулаем Россиядә дә сорау зур.
Журналистларның сорауларына җавап биреп, Татарстан Премьер-министры Рөстәм Миңнеханов әлегә SafPlast заводының чит илдән кертелгән чимал белән эшләвен хәбәр итте. “Әлегә поликарбонат – Россия өчен яңа материал, шуңа күрә җитештерү чит илдән кертелгән чимал кулланып башланды, - диде ул. – Ләкин тора-бара без аны “Казаноргсинтез” ААҖ ндә җитештерелгән үз илебез чималы белән алыштырачакбыз. Бу бик перспектив юнәлеш”. Татарстан Республикасы Хөкүмәте башлыгы журналистларга “Казаноргсинтез” ААҖ нең поликарбонат җитештерүгә инде тотынуын, ләкин аны SafPlast та файдалану өчен, чималның билгеле бер параметрларына ирешү кирәклеген искәртте.
SafPlast Innovative заводы “Ак Барс” банкы предприятиеләре төркеменә керә. “Ак Барс” банкы идарәсе рәисе хәбәр иткәнчә, проектка кертелгән инвестицияләр 800 млн. сум тәшкил иткән. Акча биш ел эчендә кире кайтарып алыныр дип көтелә.