Минтимер Шәймиев Клод-Луи Гальен һәм Олег Матыцин белән очрашты

Бүген Казан Кремлендә Татарстан Республикасы Дәүләт Киңәшчесе Минтимер Шәймиев Халыкара студентлар спорты федерациясе ФИСУ (FISU) президенты Клод-Луи Гальен, Халыкара студентлар спорты федерациясе генераль секретаре Эрик Сайнтронд, Халыкара сдудентлар спорты федерациясенең беренче вице-президенты, Россия студентлар спорты берлеге президенты Олег Матыцин белән очрашты.

Очрашу Минтимер Шәймиевнең көтелмәгән хәбәреннән башланды. “Мин үземнең җиңелүемне танырга тиешмен, Гальен әфәнде, Сез безнең шахмат партиясендә оттыгыз”,-диде ул, 9 июльдә XXVII Бөтендөнья җәйге студентлар Уеннарының шахмат турниры ачылышында ясаган беренче йөрешләрен искә алып.

“Без анда бик яхшы уйнадык”,-дип шаяртты Клод-Луи Гальен. “Без Сезнең белән шахмат турнирын ачканда, мин беренче йөрешне аклар белән ясадым, Швецариядән килгән шахматчы өчен, ә Сез каралар белән, Кытай шахматчысы өчен. Кичә без турнирда җиңүчеләрне бүләкләдек, нәтиҗәдә Кытай спортчысы Чжао Ксю җиңде һәм Универсиаданың алтын медален алды. Мин Сезне җиңүегез белән котлыйм”,-дип аңлатты Минтимер Шәймиев. “Рәхмәт, мин моның белән горурланам, чөнки мин гомеремдә беренче тапкыр шахмат уйнадым һәм чемпион булдым”,-дип җавап бирде Клод-Луи Гальен.

Минтимер Шәймиев кунакларга Универсиаданың кичә узган шахмат туры финалы турында сөйләде. Соңыннан очрашуда катнашучылар Казанда тәмамланып килүче Универсиада турында фикер алыштылар.

“Барысы да яхшы бара. Иң мөһиме, кешеләрнең, яшьләрнең күңелләре күтәренке. Универсиада – зур, җаваплы эш, ләкин ул безнең үзебез өчен, яшь буынны тәрбияләү өчен кирәк. Уеннар ике атна бара, ә барлык эшләнгән эшләр Татарстанда кала”,- дип белдерде Минтимер Шәймиев.

“Универсиададан соң Казанда матди мирас кына калмый. Ярышларда катнашучылар арасындагы дуслык бик зур әһәмияткә ия. Минем теләгем шул, Татарстан белән ФИСУ арасында дуслык саклансын иде”, - диде Клод-Луи Гальен.

“Казанда Универсиада иң югары дәрәҗәдә булды, беренче тапкыр шулай төпле, нигезле итеп эшләнде”,- дип билгеләде Эрик Сайнтронд.

Очрашу барышында шулай ук Татарстанның Халыкара студентлар спорты федерациясе белән хезмәттәшлегенең яңа юнәлешләре турында фикер алыштылар.