Дмитрий Медведев һәм Рөстәм Миңнеханов ике яклы очрашу уздырдылар

Бүген Казанда Россия Федерациясе Хөкүмәте рәисе Дмитрий Медведев һәм Татарстан Республикасы Президенты Рөстәм Миңнеханов ике яклы очрашуда XXVII Бөтендөнья җәйге Универсиада нәтиҗәләрен йомгакладылар. Очрашу Универсиада авылының Халыкара мәгълүмат үзәгендә узды.

Очрашуны ачып, Дмитрий Медведев, Универсиада уңышлы узды, дип белдерде. “Минемчә, барысы да бик яхшы килеп чыкты. Ышанам, Универсиаданың соңгы көне дә безнең җыелма команда, һәм гомумән Универсиадада катнашучыларның барысы өчен дә уңышлы булыр”,- диде РФ Хөкүмәте башлыгы.

Үз чиратында Рөстәм Миңнеханов, Уеннарга 5 ел әзерләнүнең нәтиҗәләре күренеп тора, дип ассызыклады. “Без бу вакыт эчендә яңарган, үзгәргән шәһәрне һәм республиканы күрәбез. Без илебезнең үзенчәлеген, көчен күрсәттек. Без үзебезнең шәһәрне уңайлырак ясадык”.

ТР Президенты сүзләренчә, Татарстанга федераль үзәк ярдәменнән башка шәһәрне шулкадәр киңкүләмле яңартуга 15 еллап вакыт кирәк булыр иде. “Бу эшләр илебезнең җитәкчелеге ярдәме белән эшләнде”,- дип басым ясады Рөстәм Миңнеханов.

ТР Президенты белдергәнчә, Универсиада уздыру идеясе Татарстанны гына түгел, бәлки Россияне дә берләштерде. Россия Федерациясенең 30 шәһәреннән Универсиада уты эстафетасы узды, һәм ул бар җирдә дә уртак бәйрәм буларак кабул ителде.

“Мин Россия Президентына, Сезгә, Дмитрий Анатольевич, оештыру комитеты рәисе Игорь Шуваловка, спорт министрына бик рәхмәтлемен,- диде Татарстан Президенты. Минем уйлавымча, без кышкы Олимпиадада шулай ук уңышлы чыгыш ясарга тиешбез, һәм моның өчен барысын да эшләрбез”.

РФ Премьер-министры Дмитрий Медведев Универсиаданы уздыруда катнашучыларга аерым рәхмәт белдерде. “Һәм Казанлыларга, барлык республикага зур рәхмәт белдерәсем килә, алар кунакларны, спортчыларны, туристларны бик кунакчыл каршы алалар,- диде ул. Универсиада – ул иң берләштерүче чара”.