Татарстан Премьер-министры Илдар Халиков Барселонада эшлекле сәфәрдә

2013 елның 25 июле, пәнҗешәмбе
Бүген Татарстан Республикасы Премьер-министры Илдар Халиков Барселонага (Испания) килеп җитте.

Сәфәрнең төп темасы – спортның су төрләре буенча XV дөнья чемпионаты кысаларында эшләячәк спорт объектларында булу, спортның су төрләре буенча ярышларны әзерләү һәм уздыруның халыкара тәҗрибәсен өйрәнү.

Искә төшерәбез, спортның су төрләре буенча дөнья чемпионаты Каталония провинциясе башкаласы – Барселонада 2013 нче елның 19 нчы июленнән 4 нче августына кадәр уза. Ярышларда якынча 2500 спортчы катнаша. Дөнья буйлап 520 млн. тамашачы карый. 2013 елгы дөнья чемпионатының рәсми символы - Чоп исемле су тамчысы.

Бүген кич Илдар Халиков Барселонада “Сан-Жорди” (Palau Sant Jordi) спорт сараенда, спорт сарае территориясендә урнашкан “Казан 2015” күргәзмә павильонында булыр, дип көтелә.

Моннан тыш, Татарстан Премьер-министры программасында – су тубы, синхрон йөзү, суга сикерү һ.б. ярышларда булу, спорт объектларында администраторлык, керү-чыгу, зоналарга бүлү, иминлекне тәэмин итү системалары белән танышу.

Илдар Халиковны Татарстан Республикасының профильле министрлыклары җитәкчеләре, “Казанда 2013 елгы XXVII Бөтеньдөнья җәйге Универсиаданың башкарма дирекциясе” автоном коммерцияле булмаган оешма белгечләре һ.б. озатып йөри.

Татарстан Хөкүмәте башлыгының Барселонадагы эшлекле сәфәре 28 июльгә кадәр дәвам итәчәк.

ЯҢАЛЫКЛАРГА ЯЗЫЛУ
Все материалы сайта доступны по лицензии:
Creative Commons Attribution 4.0 International