Татарстан Республикасы стендында Татарстанның инвестицион проектлары һәм Казанда узачак Универсиада-2013 белән бәйле проектлар тәкъдим ителәчәк

Бүген “Сочи-2008” VII Халыкара инвестицион форумында Татарстан стенды экспозициясен монтажлау эшләре тулы көчкә бара. 19 нчы сентябрьдә үк республика форумда үзенең инвестицион потенциалын тәкъдир итәчәк. Ул инвестицияләр өчен яңа офыклар ачарга тиеш.
Шуны да искәртик: бер көн алдан Татарстан Республикасы Премьер-министры, Татарстан делегациясенең “Сочи-2008” инвестицион форумында катнашуы турында Россия массакүләм мәгълүмат чаралары журналистларының сорауларына җавап биреп, форумда катнашуның максаты, һичшиксез, инвестицион һәм инновацион проектлар һәм коммерцияле тәкъдимнәрне тәкъдир итү, шулай ук бизнес-ширкәт вәкилләре арасындагы эшлекле бәйләнешләрне җайга салу булуын әйтеп узды. Татарстан Республикасы белән чит ил инвесторлары да кызыксына башлаган. Монда кайбер инвестицион форумнарда катнашуның да роле зур. Татарстан, инвестицияләр кертү өчен, Россия төбәкләренең иң уңайлыларыннан берсе булып тора.
“Татар-информ” мәгълүмат агентлыгы корреспондентына Татарстан Республикасының Инвестиция-венчур фондында түбәндәгеләрне әйтәләр: нефть химиясендәге инвестицион проектлардан тыш, “Сочи-2008” форумында Татарстаннан транспорт машиналары төзелеше, төзелеш индустриясе, приборлар төзү, җиһаз һәм материаллар җитештерүгә караган проектлар тәкъдим ителәчәк. Республиканың Сочида уза торган VII халыкара инвестицион форумдагы экспозициясе структуралы рәвештә ике зур зонага бүленә. Уң секторда гомумән Татарстан тәкъдир ителәчәк – барлыгы 40 инвестицион проект. Анда республиканың уңайлы инвестицион климатына, Татарстан икътисадын югары үсешкә ирешкән, диверсификацияләнгән, төп тармакларның барысы да гармонияле рәвештә үсә торган күп планлы икътисад буларак тәкъдир итүгә, һәр кластерда эре инвестицион проектларны күрсәтүгә басым ясалачак. Информация икътисадтагы төп кластерларның кисемтәләре рәвешендә бирелә, чөнки бу кабул итү өчен җайлырак. Һәр кластерда аның инновацион үсешен күрсәтә торган 5-6 конкрет проект күрсәтеләчәк. Татарстанның Сочи-2014 өчен әзерләнгән инвестицион проектларына аерым стенд багышланачак.
Экспозициядәге сул сектор Казанда Универсиада-2013 не үткәрүгә бәйле зур проектлардан торачак. Татарстан Республикасының бөтен стенды буенча интерактив терминаллар урнаштырылачак, аларның экраннарында теләге булган һәр кеше Татарстанның инвестицион проектлары буенча тулы мәгълүмат ала алачак. Татарстан Республикасы экспозициясенең күргәзмә мәйданы 250 кв.м. тәшкил итә. Шуны да искәртик: “Сочи-2008” форумының девизы: “Инвестицияләр – Россия икътисадын үстерү юлы”. Форумның төп максаты – Россия икътисадының яңартып корылуы һәм инвестицион үсеше белән бәйле мәсьәләләр буенча Россия һәм чит ил бизнесының аеруча абруйлы вәкилләре, фәнни даирәләр һәм дәүләт структураларының халыкара аралашу үзәген оештыру. Форумның төп бурычлары: җитди инвестицион проектларга ярдәм итү максатында бизнес, фән һәм хакимият вәкилләренең көчләрен берләштерү һәм Россия икътисадын актуаль икътисади идеяләрне үстерү юлы белән яңарту; Россия Федерациясенең үсеш стратегиясен булдыру; Россия Федерациясенең инвестицион яктан җәлеп итүчәнлеген арттыру һәм тышкы икътисади позицияләрне көчәйтү; Россия предприятиеләренең дөнья икътисадына интеграцияләнүенә ярдәм итү.
Моннан тыш, форум Россия Федерациясенең финанс системасын үстерү, икътисадның глобальләшүе шартларында инновацион технологияләрне кертү, Россия Федерациясенең туристлык-рекреацион комплексын үстерү, Россия Федерациясе төбәкләренең инвестицион проектларын тәкъдир итү өчен халыкара мәйданчык оештыруга булышлык итә.