Татарстан Республикасы Президенты: "Без "КАМАЗ-Мастер" командасыннан яңа уңышлар көтәбез”

"КАМАЗ-Мастер" ярышлар командасы Татарстанның халыкара аренада дәрәҗәсен арттыруга зур өлеш кертте. Бүген бу хакта Татарстан Республикасы Президенты Рөстәм Миңнеханов, республиканың иң уңышлы ярышлар коллективының 25 еллык юбилеена багышланган тантанада чыгыш ясаганда хәбәр итте. Тантана Чаллы шәһәрендә команданың базасында узды.

Команда базасында Рөстәм Миңнеханов музейга керде, анда “Ефәк юлы” һәм Africa Race ралли-рейдлары ярышларында җиңүчеләрнең яңа трофейларын карап чыкты. Татарстан Президентына ярышларда катнашучы автомобильләрне күрсәттеләр – беренче ике күчәрле "КАМАЗ-Мастер" автомобиле, ул 1994 елда төзелгән, "Дакар"да җиңүче машиналар һәм команда "Дакаре-2014"тә ярышачак яңа автомобиль.

Рөстәм Миңнеханов шулай ук команданың остаханәләрендә булды, шуннан соң юбилей тантанасында катнашты. "КАМАЗ-Мастер" командасына мөрәҗәгать итеп, Татарстан Президенты аңа бу коллектив белән булу рәхәт икәнен әйтте – элек үзе ярышларда катнашса, хәзер кунак сыйфатында.

"Бүген бик зур бәйрәм. "КАМАЗ-Мастер" командасы – Чалллының гына түгел, бөтен республиканың, бөтен илнең горурлыгы, - дип ассызыклады Рөстәм Миңнеханов. - "КАМАЗ-Мастер"ның республикабызның халыкара аренада дәрәҗәсен арттыруга өлеше бик зур".

Татарстан Президенты "КАМАЗ" җитәкчелегенә - Николай Бехка, Иван Костинга, Сергей Когогинга, 25 ел буена командага ярдәм итеп килгәнгә рәхмәт белдерде.

Рөстәм Миңнеханов ассызыклаганча, җанатарлар командадан зур уңышлар көтәләр. "Бөтен республика, бөтен "КАМАЗ", барлык илебез патриотлары "КАМАЗ-Мастер" уңышларын күзәтәләр. 22 мәртәбә сез "Дакар"да катнаштыгыз, 11 мәртәбә җиңүче булдыгыз, - дип мөрәҗәгать итте Татарстан Республикасы Президенты спортчыларга. – Хәзер "КАМАЗ-Мастер" башка ярышларда да катнаша, безнең команда кайда да җиңүче".

"Бу уңышларның нигезе - "КАМАЗ" үзе, бу команда, бу кешеләр. Болар бар да - олы хезмәт нәтиҗәсе", - диде Рөстәм Миңнеханов.

"Бүген без команданың 25 еллык эшенә йомгак ясыйбыз, һәм без яңа җиңүләргә омтылабыз. Алга, яңа уңышларга!" - диде Татарстан Президенты.

Ул команда хезмәткәрләренә бүләкләүләр тапшырды, ә җавап сүзе белән "КАМАЗ-Мастер" командасы җитәкчесе Владимир Чагин чыгыш ясады.

"Республикабыз, илебез даны өчен барысын да эшләячәкбез!" – дип вәгъдә итте Владимир Чагин һәм Рөстәм Миңнехановка "КАМАЗ-Мастер" командасы исеменнән истәлекле кубок тапшырды.