Татарстан Премьер-министры Рөстәм Миңнеханов “Казан” халыкара аэропортын үстерү һәм яңарту планын хуплады

Бүген Татарстан Республикасы Премьер-министры Рөстәм Миңнеханов “Казан” халыкара аэропортын үстерү һәм яңарту буенча “Химимпорт” холдингы (Болгария) җитәкчелеге тәкъдим иткән планны хуплады. Бу турыда ул Татарстан Республикасы Министрлар Кабинетындагы киңәшмәдә хәбәр итте. Анда “Казан” халыкара аэропортының үткәрүчәнлек мөмкинлеген арттыруны күздә тоткан эшләр графигы тәкъдим ителде.
Яңа объектларны реконструкцияләү һәм төзү “Казан” аэропортына заманча халыкара стандартлар дәрәҗәсенә ирешергә ярдәм итәчәк, пассажирларга хезмәт күрсәтү таләпләрен арттырачак һәм пассажирлар агымының тотрыклы рәвештә арта баруын тәэмин итәчәк.
Әлеге планда “Казан” халыкара аэропортын үстерү һәм яңарту эшләрен ике этапта үткәрергә тәкъдим ителә. Яңартуның беренче этабында (2010 ел ахырына) “Казан” халыкара аэропорты елына 2 миллионга кадәр пассажирга хезмәт күрсәтә алачак, икенчесендә (2013 ел мартына) бу күрсәткеч елына 5 миллион пассажирга кадәр җитәчәк.
Яңарту аэропортның өченче терминалын төзү, инде булган корылмаларга реконструкция ясау, җир асты тибындагы аслы-өсле урнашкан ике биеклектәге парковка-гараж төзү, шулай ук яңа очу-төшү полосасы һәм чиктәш җирдән бару юлларын (3400 метр озынлыкта һәм 60 метр киңлектә) төзүне күздә тота.
Киңәшмәдә катнашучылар “Казан” халыкара аэропортын яңарту һәм үстерү буенча тәкъдим ителгән эшләр графигының җентекләп тикшерелгәнлеген билгеләп уздылар.
“Без эш-гамәлләрнең төгәл планын, теге яки бу эшләрне башкару срокларын күрәбез, - диде Рөстәм Миңнеханов. – Бу юнәлештә килешеп эшләргә кирәк”.
Шуны да искәртик: агымдагы елның язында “Химимпорт” холдингы Татарстан Республикасының милли авиайөкташу системасы – “Татарстан” авиакомпаниясе үсешенә инвестицияләр кертергә теләк белдергән иде.
Бүген киңәшмәдә катнашучыларга шулай ук “Татарстан” авиакомпаниясенең үсеш концепциясе тәкъдир ителде. Концепция компаниянең авиапаркын чит илдә чыгарылган яңа самолетлар белән тәэмин итү, авиатехника комплексын үстерү, хезмәт күрсәтүче һәм техник персоналны укытуны күздә тота.
”Татарстан” авиакомпаниясенең эшләве һәм яшәп килүе республика өчен стратегик мөһим нәрсәләрнең берсе булып тора”, - диде Татарстан Республикасы Премьер-министры.