Илдар Халиков: “Татарстан эчке эшләр органнарының Универсиада вакытында башкарылган эшләре югары бәяләнде”

Татарстан эчке эшләр органнырының Казандагы XXVII Бөтендөнья җәйге Универсиаданы уздыру вакытында иминлекне тәэмин итү буенча башкарылган эшләре зур тәҗрибә алырга мөмкинлек бирде. Мондый фикерне бүген Татарстан Президенты вазыйфаларын башкаручы – ТР Премьер-министры Илдар Халиков, 2013 елның беренче яртыеллыгы нәтиҗәләре турында ТР буенча Эчке эшләр министрлыгы коллегиясе киңәшмәсендә хәбәр итте. Коллегия эшендә шулай ук Татарстан Республикасы буенча баш федераль инспектор Ренат Тимерҗанов, ТР Югары мәхкәмә рәисе Илгиз Гыйләҗев, Татарстан Республикасы прокуроры Кафил Әмиров Һ.б. катнашты.

2013 елның беренче яртыеллыгында ТР буенча Эчке эшләр министрлыгының эшчәнлеге нәтиҗәләре турында төп докладны министрлык башлыгы Артем Хохорин ясады. Универсиада вакытында оператив хәлнең катлаулануын булдырмау, беренче яртыеллыкның уңышы, дип атады ул. Моның өчен министр эчке эшләр органнары хезмәткәрләренә рәхмәт белдерде.

Иң төп уңышларның берсе итеп, Артем Хохорин җинаятьләр санының кимүен атады. 6 ай эчендә 24196 җинаять теркәлгән, бу үткән елгы күрсәткечләргә караганда 2,2 меңгә кимерәк.

Универсиаданы уздыруга килгәндә, Уеннарның иминлеген тәэмин итүдә 24,5 мең полиция һәм эчке гаскәрләрнең хәрби хезмәткәрләре катнашкан, шул исәптән 12,5 мең хезмәткәр Россиянең 74 төбәгеннән килгән. Универсиада нәтиҗәләре буенча 5 меңнән артык полиция хезмәткәре бүләкләнгән.

Татарстан прокуроры Кафил Әмиров, прокурор органнары күзәтүе тарафыннан ачылган, республика эчке эшләр органнары эшендәге кимчелекләр хакында хәбәр итте.

“Универсиада кебек чаралар уздыруда иң төп нәрсә – ул иминлек. Сезнең белән бергә без зур эш башкардык. Ул Татарстан һәм Казан халкына, кунакларга республикада көчле хокук саклау системасы эшләвен күрергә мөмкинлек бирде, һәм ул массакүләм чаралар уздыру вакытында гына түгел, бәлки көндәлек тормышта да иминлекнең нигезе булып тора”, - дип ассызыклады ТР Президенты вазыйфаларын башкаручы – ТР Премьер-министры Илдар Халиков.

“ Универсиада Татарстан полициясенә бөтен дөньяга үзенең югары профессиональлеген күрсәтергә өстәмә мөмкинлек бирде. – Бу эш республика халкы, кунаклар һәм Россия Федерациясе тарафыннан югары бәяләнде”,- дип белдерде Илдар Халиков.

ТР Хөкүмәте рәисе Татарстан Президенты Рөстәм Миңнеханов исеменнән ТР буенча Эчке эшләр министрылыгы хезмәткәрләренә куелган бурычны уңышлы үтәгән һәм башкарылган эшләр өчен рәхмәт белдерде.

“ТР буенча Эчке эшләр министрлыгы киләчәктә дә үз алдына куелган бурычларны уңышлы үтәр, дип ышанабыз, - дип белдерде Илдар Халиков үзенең чыгышын тәмамлап. Бу тупланган тәҗрибә безгә алга таба да зур чаралар уздырырга мөмкинлек бирер. Сезгә хезмәтегездә уңышлар, сәламәтлек һәм Олимпия уеннарын уздыру өчен Сочига командировкага әзерләнүче 700 хезмәткәргә аерым уңышлар телим”.

Коллегия кысаларында Илдар Халиков шулай ук ТР буенча Эчке эшләр министрлыгы хезмәткәрләренә Татарстан Республикасы дәүләт бүләкләрен тапшырды.